கோடை உணவுகள்

கற்றாழை ஜூஸ்

தேவை: சோற்றுக் கற்றாழை ஜெல் – அரை கப் (சோற்றுக் கற்றாழையின் வெளித்தோலைச் சீவி எடுத்து உட்புறம் உள்ள ஜெல்லை எடுத்துக் கொள்ளவும்) எலுமிச்சைப் பழம் – ஒன்று சர்க்கரை – 2 டேபிள்ஸ்பூன் உடைத்த ஐஸ்கட்டிகள் – சிறிதளவு தேன் – ஒரு டீஸ்பூன் உப்பு – ஒரு சிட்டிகை.

செய்முறை: சோற்றுக் கற்றாழையின் உள்ளே இருக்கும் ஜெல்லை ஐந்து (அ) ஆறு முறை நன்கு அலசவும். எலுமிச்சையைச் சாறு பிழியவும். அதனுடன் உப்பு, சர்க்கரை, கால் கப் சோற்றுக் கற்றாழை ஜெல், உடைத்த ஐஸ்கட்டிகள் சேர்த்து மிக்ஸியில் அடித்தெடுக்கவும். உயரமான கண்ணாடி டம்ளரில் ஊற்றி மேலே மீதமுள்ள ஜெல், தேன் சேர்த்துக் கலந்து பருகவும்.

சிறப்பு: இந்த ஜூஸ், உடல் சூட்டைத் தணிக்கும்; மலச்சிக்கலைப் போக்கும்.


பனங்கிழங்கு பிரட்டல்

தேவை: முழுப் பனங்கிழங்கு – 2 மிளகுத்தூள் – ஒரு டீஸ்பூன் பூண்டு – 3 பல் (தட்டவும்) எண்ணெய், உப்பு – சிறிதளவு.

செய்முறை: குக்கரில் பனங்கிழங்குடன் மூழ்கும் அளவு தண்ணீர் சேர்த்து, சிறிதளவு உப்பு போட்டு வேகவிட்டு எடுக்கவும். நன்கு வெந்ததும் தோல் நீக்கி உடைத்து நார் எடுக்கவும். பிறகு கிழங்கைப் பிளந்தால் உள்ளே கிழங்கில் தும்பு (குச்சி) இருக்கும். அதை தனியே எடுத்துவிடவும். பிறகு, கிழங்கைச் சிறிய துண்டுகளாக்கவும் (குச்சியின் நுனியில் இருக்கும் மிருதுவான பகுதியைச் சாப்பிடலாம்). வாணலியில் சிறிதளவு எண்ணெய்விட்டுச் சூடானதும் கிழங்குத் துண்டுகள், மிளகுத்தூள், பூண்டு, உப்பு சேர்த்துக் கிளறி எடுக்கவும். தோல் உரித்து முழு கிழங்காகவும் சாப்பிடலாம்.

சிறப்பு: நார்ச்சத்து உள்ளது. நீரிழிவு உள்ளவர்களுக்கும் உடல் மெலிந்தவர்களுக்கும் நல்லது. உடலுக்குக் குளிர்ச்சி தரும்.


சின்ன வெங்காயத் தொக்கு

தேவை: தோலுரித்த சின்ன வெங்காயம் – ஒரு கப் (இரண்டாக நறுக்கவும்) தக்காளி – 2 (பொடியாக நறுக்கவும்) பூண்டு – 4 பல் (பொடியாக நறுக்கவும்) மஞ்சள்தூள் – ஒரு சிட்டிகை கடுகு – அரை டீஸ்பூன் மிளகாய்த்தூள் – ஒரு டீஸ்பூன் தோல் சீவி துருவிய இஞ்சி – ஒரு டீஸ்பூன் எண்ணெய், உப்பு – தேவையான அளவு.

செய்முறை: வாணலியில் எண்ணெய்விட்டுச் சூடாக்கி கடுகு தாளித்து வெங்காயம், இஞ்சி, பூண்டு, தக்காளி சேர்த்து நன்கு வதக்கவும். அதனுடன் சிறிதளவு தண்ணீர் தெளித்து, உப்பு, மஞ்சள்தூள், மிளகாய்த்தூள் சேர்த்து வதக்கி இறக்கவும்.

குறிப்பு: சின்ன வெங்காயத்தை விழுதாக அரைத்தும் சேர்க்கலாம். பச்சை வாசனை போகும் வரை வதக்கவும். இதை பிரெட் மீது தடவலாம்; தோசை, சப்பாத்தியுடன் பரிமாறலாம்; சாதத்துடன் பிசைந்து சாப்பிடலாம்.


நுங்கு கீர்

தேவை: தோல் நீக்கிய இளம் நுங்குத் துண்டுகள் – ஒரு கப் கெட்டியான தேங்காய்ப்பால் – ஒரு கப் ஏலக்காய்த்தூள் – ஒரு சிட்டிகை குங்குமப்பூ – சிறிதளவு பாதாம் பிசின் – 2 டேபிள்ஸ்பூன் (நீரில் ஆறு முதல் எட்டு மணி நேரம் வரை ஊறவைக்கவும்) நெய் – ஒரு டேபிள்ஸ்பூன் உலர் வெள்ளரி விதை (அ) பூசணி விதை – ஒரு டீஸ்பூன் பொடித்த சர்க்கரை – கால் கப்.

செய்முறை: வாணலியில் நெய்விட்டுச் சூடாக்கி வெள்ளரி விதைகளைச் சேர்த்து வறுக்கவும். அதனுடன் தேங்காய்ப்பால் சேர்த்து, அடுப்பை சிறு தீயில் வைத்துக் கிளறவும். பிறகு, சர்க்கரை சேர்த்துக் கரையவிடவும். அதனுடன் நுங்குத் துண்டுகள், பாதாம் பிசின், ஏலக்காய்த்தூள், குங்குமப்பூ சேர்த்துக் கிளறி இறக்கவும். இதைச் சூடாகவோ, குளிரவைத்தோ பரிமாறலாம்.


நீராகாரம்

தேவை: வடித்த சாதம் – 2 கப் சாதம் வடித்த கஞ்சி – ஒரு கப் தோலுரித்த சின்ன வெங்காயம் – அரை கப் மோர் – சிறிதளவு (விருப்பப்பட்டால்) பச்சை மிளகாய் – 2 (பொடியாக நறுக்கவும்) தண்ணீர், உப்பு – தேவையான அளவு.

செய்முறை: மண் சட்டியில் சாதத்துடன் தேவையான அளவு தண்ணீர் சேர்த்து மூடி வைக்கவும். மறுநாள் காலையில் நீரை வடித்துத் தனியாக வைக்கவும். சாதத்துடன் உப்பு, மோர் சேர்த்துப் பிசையவும். அதனுடன் பச்சை மிளகாய், வெங்காயம், வடிகட்டிய தண்ணீர், சாதம் வடித்த கஞ்சி சேர்த்துக் கலந்து பருகவும். மோர் மிளகாய், பூண்டு ஊறுகாய் தொட்டுக்கொண்டு சாப்பிடலாம்.

சிறப்பு: இது செரிமான சக்தி தரும். நோய் எதிர்ப்புச் சக்தியும் நிறைந்தது.


வெந்தயக்களி

தேவை: இட்லி அரிசி – 2 கப் வெந்தயம் – 2 டேபிள்ஸ்பூன் கருப்பட்டித் தூள், தினை – தலா 50 கிராம் நல்லெண்ணெய் – சிறிதளவு உப்பு – தேவையான அளவு.

செய்முறை: இட்லி அரிசி, தினை, வெந்தயத்தைத் தனித்தனியாக ஆறு மணி நேரம் ஊறவைக்கவும். அரிசியுடன் தேவையான அளவு தண்ணீர்விட்டு நைஸாக அரைத்தெடுக்கவும். வெந்தயத்துடன் தினை, சிறிதளவு உப்பு சேர்த்துத் தண்ணீர்விட்டு நைஸாக அரைத்தெடுக்கவும். இதனுடன் அரைத்த அரிசி மாவைச் சேர்த்து ஒரு சுற்று அரைத்தெடுக்கவும். அதனுடன் உப்பு சேர்த்துக் கரைக்கவும். அடிகனமான பாத்திரத்தில் அரைத்த கலவை சேர்த்துச் சூடாக்கவும். அடுப்பை சிறு தீயில் வைத்து, கைவிடாமல் கிளறி நன்கு வெந்த பிறகு இறக்கவும். கருப்பட்டியுடன் மூழ்கும் அளவு தண்ணீர்விட்டுக் கரைத்து வடிகட்டவும். களியின் நடுவில் பள்ளம் செய்து கருப்பட்டி கரைசலைவிட்டுப் பரிமாறலாம். விரும்பினால் நல்லெண்ணெய் சிறிதளவு சேர்த்துச் சாப்பிடலாம்.


நெல்லிக்காய் சட்னி

தேவை: முழு நெல்லிக்காய் – 6 (கொட்டை நீக்கி, துண்டுகளாக்கவும்) முழு உளுத்தம்பருப்பு – அரை கப் காய்ந்த மிளகாய் – 2 பெருங்காயத்தூள் – ஒரு சிட்டிகை கொத்தமல்லித்தழை – ஒரு கைப்பிடியளவு (அலசி ஆய்ந்தது) கடுகு – அரை டீஸ்பூன் எண்ணெய், உப்பு – தேவையான அளவு.

செய்முறை: வாணலியில் எண்ணெய்விட்டுச் சூடானதும் உளுத்தம்பருப்பு, காய்ந்த மிளகாய் சேர்த்து வறுக்கவும். அதனுடன் நெல்லிக்காய், பெருங்காயத்தூள், உப்பு, கொத்தமல்லித்தழை சேர்த்து வதக்கி இறக்கவும். ஆறியதும் அதனுடன் தண்ணீர்விட்டு மிக்ஸியில் நைஸாக அரைத்தெடுக்கவும். வாணலியில் எண்ணெய்விட்டு கடுகு தாளித்துச் சட்னியுடன் கலக்கவும்.

சிறப்பு: நெல்லிக்காயை ஆவியில் வேகவைத்தும் அரைக்கலாம்.


பீட்ரூட் – வெந்தய ஆப்பம்

தேவை: இட்லி அரிசி – 2 கப் பீட்ரூட் துருவல் – அரை கப் தேங்காய்ப்பால் – ஒரு கப் வெந்தயம் – 2 டேபிள்ஸ்பூன் ஏலக்காய்த்தூள் – ஒரு சிட்டிகை எண்ணெய் – நெய் கலவை – சிறிதளவு முழு உளுத்தம்பருப்பு – 2 டேபிள்ஸ்பூன் உப்பு – சிறிதளவு.

செய்முறை: வெந்தயத்துடன் உளுத்தம்பருப்பு சேர்த்து மூன்று மணி நேரம் ஊற வைக்கவும். அரிசியைத் தனியாக மூன்று மணி நேரம் ஊற வைக்கவும். ஊறிய வெந்தயம், உளுத்தம்பருப்பை அரைக்கவும். அதனுடன் அரிசியைச் சேர்த்து அரைக்கவும். இறுதியாக பீட்ரூட் துருவல், உப்பு சேர்த்து அரைத்து எட்டு மணி நேரம் புளிக்கவிடவும். ஆப்பக்கல்லில் சிறிதளவு நெய் தடவி, மாவை ஊற்றி மூடிபோட்டு வேகவிட்டு எடுக்கவும்.

தேங்காய்ப்பாலுடன் ஏலக்காய்த்தூள் சேர்த்துக் கலந்து ஆப்பத்தில் ஊற்றிச் சாப்பிடலாம். விரும்பினால் தேங்காய்ப்பாலுடன் நாட்டுச் சர்க்கரை சேர்க்கலாம். பூண்டு மிளகாய்ப் பொடி தொட்டும் சாப்பிடலாம்.

சிறப்பு: வெந்தயமும் தேங்காய்ப்பாலும் வயிற்றுப் புண்ணைப் போக்கும்.


ரோஜா குல்கந்து லட்டு

தேவை: பன்னீர் ரோஜாப்பூ இதழ்கள் – ஒரு கப் (அலசி, நிழலில் நான்கு நாள்கள் உலர்த்தவும்) தேன் – தேவையான அளவு கசகசா – ஒரு டீஸ்பூன் டைமண்ட் கற்கண்டு – ஒன்றரை கப் வெள்ளரி விதை, முந்திரி – தலா ஒரு டேபிள்ஸ்பூன்.

செய்முறை: உலர்ந்த ரோஜா இதழ்களுடன் கற்கண்டைச் சேர்த்து மிக்ஸியில் விழுதாக அரைத்தெடுக்கவும். இதனுடன் தேன், வெள்ளரி விதை, முந்திரி சேர்த்துக் கலக்கவும். பிறகு இந்தக் கலவையைச் சிறிய உருண்டைகளாக்கி, கசகசாவில் புரட்டி எடுத்துப் பரிமாறவும்.

சிறப்பு: ஜீரணச்சக்திக்கும் உடல் குளிர்ச்சிக்கும் நல்லது. பித்த அளவை சீராக்கும். இதயம் வலுப்பெறும். அல்சருக்கு நல்ல மருந்து. மலச்சிக்கலில் இருந்தும் நிவாரணம் அளிக்கும்.


சுரைக்காய் மோர்க்குழம்பு

தேவை: தோல், விதை நீக்கி சதுரமாக நறுக்கிய சுரைக்காய் – கால் கப் (வேகவைக்கவும்) கெட்டித்தயிர் – ஒரு கப் (கடையவும்) கடுகு – ஒரு டீஸ்பூன் கறிவேப்பிலை – சிறிதளவு மஞ்சள்தூள், பெருங்காயத்தூள் – தலா ஒரு சிட்டிகை கடலைப்பருப்பு, துவரம்பருப்பு, முழு உளுத்தம்பருப்பு – தலா ஒரு டீஸ்பூன் காய்ந்த மிளகாய் – 2, எண்ணெய், உப்பு – தேவையான அளவு.

செய்முறை: பருப்பு வகைகளை வெறும் வாணலியில் தனித்தனியாக வறுத்துப் பொடித்தெடுக்கவும். தயிருடன் உப்பு, மஞ்சள்தூள், வறுத்த பொடி சேர்த்துக் கரைக்கவும். வாணலியில் எண்ணெய்விட்டுச் சூடானதும் கடுகு, கறிவேப்பிலை, காய்ந்த மிளகாய், பெருங்காயத்தூள் தாளிக்கவும். அதனுடன் மோர்க்கலவை, வேகவைத்த சுரைக்காய் சேர்த்து அடுப்பைக் குறைந்த தீயில் வைத்து, ஒரு கொதிவிட்டு இறக்கவும். சுவையான, உடலுக்குக் குளிர்ச்சி தரும் மோர்க்குழம்பு ரெடி.


மசாலா மோர்

தேவை: கெட்டித் தயிர் – ஒரு கப் கொத்தமல்லித்தழை (அலசி ஆய்ந்தது) – 2 டேபிள்ஸ்பூன் தோல் சீவி துருவிய இஞ்சி – அரை டீஸ்பூன் சிறிய பச்சை மிளகாய் – ஒன்று ஓமம், சீரகம் – தலா அரை டீஸ்பூன் பொடியாக நறுக்கிய சின்ன வெங்காயம் – ஒரு டேபிள்ஸ்பூன் பெருங்காயத்தூள் – ஒரு சிட்டிகை கறிவேப்பிலை – ஒரு டேபிள்ஸ்பூன் உப்பு – சிறிதளவு.

செய்முறை: தயிருடன் உப்பு, கொத்தமல்லித்தழை, இஞ்சி, பச்சை மிளகாய், ஓமம், சீரகம், பெருங்காயத்தூள், கறிவேப்பிலை, தேவையான அளவு நீர் சேர்த்து மிக்ஸியில் அரைத்து வடிகட்டவும். அதனுடன் வெங்காயம் சேர்த்துக் கலந்து பருகவும்.

சிறப்பு: இது உடலுக்குக் குளிர்ச்சி தரும். தாகத்தைத் தணிக்கும்.


டிராகன் ஃப்ரூட் மில்க்‌ஷேக்

தேவை: டிராகன் பழம் – ஒன்று (தோல் சீவி, சிறிய துண்டுகளாக்கவும்) காய்ச்சி ஆறவைத்த பால் – ஒரு கப் சர்க்கரை – 2 டேபிள்ஸ்பூன் ஸ்ட்ராபெர்ரி – 2 (சிறிய துண்டுகளாக்கவும்) சப்ஜா விதை – ஒரு டீஸ்பூன் (தண்ணீரில் 15 நிமிடங்கள் ஊறவிடவும்).

செய்முறை: பாலுடன் டிராகன் பழம், ஸ்ட்ராபெர்ரி, சர்க்கரை, சிறிதளவு தண்ணீர் சேர்த்து அரைத்தெடுக்கவும். இதைக் கண்ணாடி டம்ளரில் ஊற்றி, மேலே சப்ஜா விதை சேர்த்துப் பரிமாறவும். குளிரவைத்தும் பரிமாறலாம்.

சிறப்பு: டிராகன் ஃப்ரூட் எடை குறைப்புக்கு உதவும். புரோட்டீன், வைட்டமின் பி, சி அடங்கியது. இது புற்றுநோய் வருவதைத் தடுக்கும் தன்மை கொண்டது.


தர்ப்பூசணி – வெள்ளரி சாலட்

தேவை: தோல், விதை நீக்கி சதுரமாக நறுக்கிய தர்ப்பூசணித் துண்டுகள் – அரை கப் சதுரமாக நறுக்கிய வெள்ளரித் துண்டுகள் – கால் கப் மிளகுத்தூள் – ஒரு டீஸ்பூன்.

செய்முறை: தர்ப்பூசணித் துண்டுகளுடன் வெள்ளரித் துண்டுகள் சேர்த்துப் பிசிறவும். மேலே மிளகுத்தூள் தூவி, டூத்பிக் அல்லது ஃபோர்க் வைத்துப் பரிமாறவும்.

சிறப்பு: வேறு குளிர்ச்சியான பழ வகைகளையும் இதில் சேர்க்கலாம்.


வெந்தயக்குழம்பு

தேவை: வெந்தயம், முளைகட்டிய வெந்தயம் – தலா ஒரு டீஸ்பூன் புளி – சிறிதளவு தக்காளி – ஒன்று (பொடியாக நறுக்கவும்) பூண்டு – 10 பல் தோலுரித்த சின்ன வெங்காயம் – 10 மிளகாய்த்தூள் – ஒரு டீஸ்பூன் மஞ்சள்தூள் – ஒரு சிட்டிகை தேங்காய்த் துருவல் – கால் கப் கொத்தமல்லித்தழை, கறிவேப்பிலை – சிறிதளவு கடுகு – ஒரு டீஸ்பூன் தனியாத்தூள் (மல்லித்தூள்) – அரை டீஸ்பூன் காய்ந்த மிளகாய் – 2 நல்லெண்ணெய், உப்பு – தேவையான அளவு.

செய்முறை: புளியை ஊறவைத்துக் கரைக்கவும். தேங்காய்த் துருவலுடன் சிறிதளவு தண்ணீர் சேர்த்து நைஸாக அரைத்தெடுக்கவும். வெறும் வாணலியில் வெந்தயத்தைச் சேர்த்து வறுத்துப் பொடிக்கவும். அதே வாணலியில் நல்லெண்ணெய்விட்டுச் சூடாக்கி கடுகு, காய்ந்த மிளகாய் தாளிக்கவும். அதனுடன் கறிவேப்பிலை, வெங்காயம், தக்காளி, பூண்டு சேர்த்து வதக்கவும். பிறகு புளிக்கரைசல், உப்பு, மஞ்சள்தூள், மிளகாய்த்தூள், தனியாத்தூள் சேர்த்து ஒரு கொதிவிடவும். அதனுடன் அரைத்த தேங்காய் விழுது சேர்த்து, அடுப்பை சிறு தீயில் வைத்து, குழம்பு சுண்டும்போது அரைத்த வெந்தயப் பொடி, முளைகட்டிய வெந்தயம், கொத்தமல்லித்தழை சேர்த்துக் கலந்து இறக்கவும்.

சிறப்பு: இது உடலுக்குக் குளிர்ச்சி தரும். வயிற்றுப் பிரச்னைகளிலிருந்து நிவாரணம் அளிக்கும்.


முருங்கைக்கீரை சூப்

தேவை: முருங்கை இலை – ஒரு கப் தேங்காய்ப்பால் – 2 டேபிள்ஸ்பூன் பாசிப்பருப்பு – ஒரு டேபிள்ஸ்பூன் கேரட் துருவல் – 2 டேபிள்ஸ்பூன் தக்காளி – ஒன்று (பொடியாக நறுக்கவும்)
தோலுரித்த சின்ன வெங்காயம் – 6 சீரகத்தூள், மிளகுத்தூள், இஞ்சி சாறு – தலா ஒரு டீஸ்பூன் பூண்டு – 3 பல் (தட்டவும்) உப்பு – தேவையான அளவு.

செய்முறை: குக்கரில் முருங்கை இலை, வெங்காயம், தக்காளி, கேரட் துருவல், பூண்டு, பாசிப்பருப்பு, சிறிதளவு உப்பு, இஞ்சி சாறு, தேவையான அளவு தண்ணீர்விட்டு மூடி மூன்று விசில்விட்டு இறக்கவும். ஆறியதும் மிக்ஸியில் ஒரு சுற்றுவிட்டு அரைத்து வடிகட்டவும். அதனுடன் தேங்காய்ப்பால் சேர்த்து அடுப்பில் வைத்து ஒரு கொதிவிட்டு இறக்கவும். மேலே சீரகத்தூள், மிளகுத்தூள் தூவிச் சூடாகப் பருகவும்.

சிறப்பு: இந்த சூப் உடல் சூடு தணிக்கும். பித்த மயக்கம், கண் சம்பந்தப்பட்ட கோளாறுகளைச் சரியாக்கும்.


இன்ஸ்டன்ட் முலாம்பழக் குழிப்பணியாரம்

தேவை: தோசை மாவு – ஒரு கப் தோல், விதைகள் நீக்கி அரைத்த முலாம்பழக் கூழ் – அரை கப் வெல்லக் கரைசல் – கால் கப் உலர்திராட்சை – ஒரு டேபிள்ஸ்பூன் ஏலக்காய்த்தூள் – ஒரு சிட்டிகை விருப்பமான நட்ஸ் – 2 டேபிள்ஸ்பூன் நெய் – சிறிதளவு.

செய்முறை: தோசை மாவுடன் முலாம்பழக் கூழ், வெல்லக் கரைசல், உலர் திராட்சை, ஏலக்காய்த்தூள், நட்ஸ் வகைகள் சேர்த்துக் கலக்கவும். குழிப்பணியாரக் கல்லைக் காயவைத்து, குழிகளில் நெய் தடவி, பாதி குழியளவு மாவை ஊற்றவும். பணியாரம் வெந்து எழும்பி வரும். பிறகு, திருப்பி போட்டு இருபுறமும் வேகவைத்து எடுக்கவும்.

சிறப்பு: உடல் வெப்பத்தைப் போக்கும். மூலநோய் சரியாக உதவும்.


பனங்கிழங்குக் கஞ்சி

தேவை: பனங்கிழங்கு மாவு – அரை கப் தேங்காய்ப்பால் – ஒரு கப் காய்ச்சி ஆறவைத்த பால் – அரை கப் ஏலக்காய்த்தூள் – ஒரு சிட்டிகை கருப்பட்டித்தூள் (அ) நாட்டுச் சர்க்கரை – 3 டேபிள்ஸ்பூன் நட்ஸ் துருவல் (பாதாம், முந்திரி) – ஒரு டேபிள்ஸ்பூன்.

செய்முறை: பனங்கிழங்கு மாவுடன் சிறிதளவு தண்ணீர்விட்டுக் கரைக்கவும். அடிகனமான வாணலியில் பால்விட்டுச் சூடாக்கி, ஒரு கொதிவந்ததும், அடுப்பைக் குறைந்த தீயில் வைத்து கரைத்த மாவை ஊற்றிக் கைவிடாமல் கிளறவும். அதனுடன் ஏலக்காய்த்தூள், கருப்பட்டி தூள் (அ) நாட்டுச் சர்க்கரை சேர்த்து ஒரு கொதிவிட்டு இறக்கவும் (பாலில் மாவை நன்கு வேகவிடவும்). அதனுடன் தேங்காய்ப்பால் சேர்த்து, வறுத்த நட்ஸ் தூவி, சூடாகப் பரிமாறவும்.

குறிப்பு: பனங்கிழங்கைத் துண்டுகளாக்கி உலர்த்தி மாவாக அரைத்தெடுக்கவும்.


பிஞ்சு வெண்டை – சிந்தி மசால் கறி

தேவை: நறுக்கிய பிஞ்சு வெண்டைக்காய் – ஒரு கப் தக்காளி – 2 (பொடியாக நறுக்கவும்) ஆம்சூர் பவுடர் (உலர் மாங்காய்த்தூள்) – ஒரு டீஸ்பூன் பூண்டு – 8 பல் (பொடியாக நறுக்கவும்) தோலுரித்துப் பொடியாக நறுக்கிய சின்ன வெங்காயம் – அரை கப் மிளகாய்த்தூள் – ஒரு டீஸ்பூன் கரம் மசாலாத்தூள் – அரை டீஸ்பூன் எண்ணெய், உப்பு – தேவையான அளவு.

செய்முறை: வாணலியில் எண்ணெய்விட்டுச் சூடாக்கி வெங்காயம், பூண்டு, தக்காளி சேர்த்து வதக்கவும். அதனுடன் வெண்டைக்காய், உப்பு, மிளகாய்த்தூள், ஆம்சூர் பவுடர், கரம் மசாலாத்தூள் சேர்த்து வதக்கவும். பிறகு சிறிதளவு தண்ணீர் தெளித்துக் கிளறி 10 நிமிடங்கள் மூடிவைத்து, அடுப்பை சிறு தீயில் வைத்து, வேகவிட்டுக் கிளறி எடுக்கவும். இதைச் சப்பாத்தி, தோசைக்குத் தொட்டுக்கொள்ளலாம். சாதத்துக்கும் தொட்டுக்கொள்ளலாம். தக்காளியை அரைத்து வடிகட்டிச் சாறாகவும் சேர்க்கலாம்.

சிறப்பு: இது கிட்னி பாதிப்பு வராமல் தடுக்கும்; பெருங்குடலில் வரும் புற்றுநோயையும் தடுக்கும்.


வாழைத்தண்டுப் பச்சடி

தேவை: நார் நீக்கி, பொடியாக நறுக்கிய வாழைத்தண்டு – அரை கப் சின்ன வெங்காயத் துருவல் – ஒரு டேபிள்ஸ்பூன் கடுகு – அரை டீஸ்பூன் கறிவேப்பிலை – சிறிதளவு பெருங்காயத்தூள் – ஒரு சிட்டிகை தயிர் – ஒரு கப் பச்சை மிளகாய் – ஒன்று (பொடியாக நறுக்கவும்) சீரகம் – அரை டீஸ்பூன் கொத்தமல்லித்தழை விழுது – ஒரு டீஸ்பூன் தோல் சீவி துருவிய இஞ்சி – ஒரு டீஸ்பூன் எண்ணெய், உப்பு – தேவையான அளவு.

செய்முறை: வாழைத்தண்டுடன் தண்ணீர் சேர்த்து வேகவிட்டு எடுக்கவும். வாணலியில் எண்ணெய்விட்டுச் சூடாக்கி கடுகு, சீரகம், கறிவேப்பிலை, பெருங்காயத்தூள், பச்சை மிளகாய், இஞ்சி தாளித்து, தயிருடன் கலக்கவும். அதனுடன் வேகவைத்த வாழைத்தண்டு, உப்பு, வெங்காயம், கொத்தமல்லித்தழை விழுது சேர்த்துக் கலந்து பரிமாறவும்.


ஸ்டஃப்டு புடலை

தேவை: பிஞ்சு புடலங்காய் – ஒன்று தேங்காய்த் துருவல் – 2 டேபிள்ஸ்பூன் கடலைப்பருப்பு, பாசிப்பருப்பு – தலா 2 டேபிள்ஸ்பூன் காய்ந்த மிளகாய் – 3 நறுக்கிய சின்ன வெங்காயம் – கால் கப் சோம்பு – ஒரு டீஸ்பூன் கொத்தமல்லித்தழை – சிறிதளவு (அலசி ஆய்ந்தது) முளைகட்டிய பச்சைப் பயறு – ஒரு டேபிள்ஸ்பூன் எண்ணெய், உப்பு – தேவையான அளவு.

செய்முறை: புடலங்காயை மூன்று இன்ச் துண்டுகளாக வெட்டி உள்ளே இருக்கும் விதைகளை நீக்கவும். கடலைப்பருப்பு, பாசிப்பருப்புடன் காய்ந்த மிளகாய் சேர்த்து 20 நிமிடங்கள் ஊறவைத்து, சிறிதளவு உப்பு சேர்த்துக் கொரகொரவென அரைத்தெடுக்கவும். இதை ஆவியில் வேகவிட்டு எடுத்து உதிர்க்கவும். வாணலியில் எண்ணெய்விட்டுச் சூடாக்கிச் சின்ன வெங்காயம், சோம்பு, தேங்காய்த் துருவல், பச்சைப் பயறு, உப்பு சேர்த்து வதக்கவும். அதனுடன் உதிர்த்த பருப்பு, கொத்தமல்லித்தழை சேர்த்துக் கிளறி இறக்கவும். இந்த மசாலாவைப் புடலைக்குள் வைத்து அழுத்தவும். வாணலியில் எண்ணெய்விட்டுச் சூடாக்கி ஸ்டஃப்பிங் செய்த புடலையை வைத்து எல்லாப் பக்கமும் பொன்னிறமாக ஃப்ரை செய்து எடுக்கவும்.

குறிப்பு: மசாலா ஸ்டஃப்பிங்கைப் புடலைக்குள் நன்கு அழுத்தி வைக்கவும். இல்லாவிட்டால் ஃப்ரை செய்யும்போது உதிர்ந்துவிடும்.


பதநீர் – நுங்கு பானகம்

தேவை: தோல் நீக்கிய இளம் நுங்கு – 10 (துண்டுகளாக்கவும்) பதநீர் – ஒரு கப் பொடித்த கருப்பட்டி – ஒரு டேபிள்ஸ்பூன் வெட்டி வேர் சிரப் (நீர்) – கால் கப் பொடித்த ஐஸ்கட்டிகள் – சிறிதளவு
ஏலக்காய் – 2 (தட்டவும்).

செய்முறை: வெட்டி வேரை அலசி 24 மணி நேரம் ஊறவைத்து வடிகட்டி எடுத்தால் சிரப் ரெடி. கால் கப் சிரப்புடன் நுங்கு, பதநீர், பொடித்த ஐஸ்கட்டிகள், ஏலக்காய், பொடித்த கருப்பட்டி சேர்த்து நன்கு கலந்து பருகலாம்.

இளம் நுங்கைப் பதநீரில் சேர்த்தும் அருந்தலாம். வெட்டி வேர் நாட்டு மருந்துக் கடையில் கிடைக்கும்.

சிறப்பு: இதை அருந்தினால் வயிற்றுப்புண், தொண்டைப்புண், உடல் சூடு, மலச்சிக்கல் குணமாகும்.


வெல்லம் – நன்னாரி பானகம்

தேவை: வெல்லக் கரைசல் நீர் – 2 கப் (2 டேபிள்ஸ்பூன் வெல்லத்துருவலை நீரில் நன்கு கரைத்துக்கொள்ளவும்) நன்னாரி சிரப் (கடைகளில் ரெடிமேடாகக் கிடைக்கும்) – ஒரு டேபிள்ஸ்பூன் சுக்குத்தூள் – ஒரு சிட்டிகை ஏலக்காய் – ஒன்று (தட்டவும்) எலுமிச்சைப் பழம் பாதியளவு (சாறு பிழியவும்).

செய்முறை: வெல்லக் கரைசலுடன் நன்னாரி சிரப், சுக்குத்தூள், ஏலக்காய், எலுமிச்சைச் சாறு சேர்த்துக் கலக்கவும். அதனுடன் ஐஸ்கட்டிகள் சேர்த்துப் பருகலாம்.

சிறப்பு: இது உடல் வெப்பத்தைத் தணிக்கும்.


முள்ளங்கி சூப்

தேவை: முள்ளங்கி – ஒன்று (தோல் சீவி, சிறிய துண்டுகளாக்கவும்) தோல் சீவி துருவிய இஞ்சி – ஒரு டீஸ்பூன் வெண்ணெய் – சிறிதளவு மிளகுத்தூள், சீரகம் – தலா ஒரு டீஸ்பூன் பூண்டு – 2 பல் முளைகட்டிய பச்சைப்பயறு – 2 டேபிள்ஸ்பூன் உப்பு – தேவைக்கேற்ப.

செய்முறை: குக்கரில் முள்ளங்கியுடன் இஞ்சி, சீரகம், பூண்டு, பச்சைப்பயறு. உப்பு, ஒரு கப் தண்ணீர் சேர்த்து மூடி இரண்டு விசில்விட்டு இறக்கவும். ஆறியதும் மத்தால் மசிக்கவும். சூடாக சூப் பவுலில் ஊற்றி வெண்ணெய் சேர்த்துக் கலந்து, மிளகுத்தூள் தூவிப் பருகலாம்.

சிறப்பு: முள்ளங்கி உடலில் உள்ள கழிவுகளை வெளியேற்றி, உடலுக்குக் குளிர்ச்சியை அளிக்கும்.


பாதாம் பிசின் பால்

தேவை: பாதாம் பிசின் – 10 கிராம் (பத்து மணி நேரம் நீரில் ஊற வைக்கவும்) காய்ச்சி ஆறவைத்த பால் – ஒரு கப் பொடித்த பனங்கற்கண்டு – ஒரு டேபிள்ஸ்பூன் ஏலக்காய்த்தூள் – ஒரு சிட்டிகை இஞ்சிச் சாறு – ஒரு டீஸ்பூன் ரோஜா குல்கந்து – ஒரு டேபிள்ஸ்பூன் ரோஸ் எசென்ஸ் – ஒரு துளி.

செய்முறை: கொடுக்கப்பட்ட பொருள்களை ஒன்றாகச் சேர்த்து மிக்ஸியில் ஒரு சுற்று அரைத்தெடுக்கவும். இதை ஃப்ரிட்ஜில் சிறிது நேரம் வைத்து எடுத்துப் பருகலாம்.

சிறப்பு: இந்தப் பால் உடலுக்குக் குளிர்ச்சி தரும்.


மூலிகை டீ

தேவை: காம்பு நீக்கிய ஆவாரம்பூ, செம்பருத்திப்பூ இதழ்கள், துளசி இலை – தலா ஒரு டேபிள்ஸ்பூன் பொடித்த பனை வெல்லம் (அ) நாட்டுச் சர்க்கரை – ஒரு டேபிள்ஸ்பூன் ஏலக்காய் – 2 ரோஜாப்பூ இதழ்கள் – 2 டேபிள்ஸ்பூன் சுக்குத்தூள் – அரை டீஸ்பூன் வெற்றிலை – ஒன்று.

செய்முறை: ஆவாரம்பூ, செம்பருத்திப்பூ, வெற்றிலை, துளசி, ரோஜாப்பூ இதழ்களை அலசி நான்கு நாள்கள் நிழலில் உலர்த்தவும். அதனுடன் ஏலக்காய், சுக்குத்தூள் சேர்த்து அரைத்தெடுக்கவும். இதுவே மூலிகைப்பொடி. ஒரு கப் தண்ணீருடன் ஒரு டீஸ்பூன் மூலிகைப் பொடி சேர்த்து நன்கு கொதிக்கவிட்டு வடிகட்டவும். அதனுடன் பொடித்த பனை வெல்லம் (அ) நாட்டுச் சர்க்கரை சேர்த்துக் கலந்து மிதமான சூட்டில் பருகவும்.


முளைகட்டிய வெந்தயம் – பச்சைப்பயறு சாட்

தேவை: முளைகட்டிய வெந்தயம் – ஒரு டேபிள்ஸ்பூன் முளைகட்டிய பச்சைப்பயறு – 3 டேபிள்ஸ்பூன் சாட் மசாலாத்தூள் – ஒரு டீஸ்பூன் பொடியாக நறுக்கிய தக்காளி – ஒரு டேபிள்ஸ்பூன் பொடியாக நறுக்கிய வெள்ளை வெங்காயம் – 2 டேபிள்ஸ்பூன் யோகர்ட் (இனிப்புத் தயிர்) – கால் கப் பொடியாக நறுக்கிய கொத்தமல்லித்தழை – ஒரு டேபிள்ஸ்பூன் உப்பு – ஒரு சிட்டிகை.

செய்முறை: வாய் அகன்ற பாத்திரத்தில் முளைகட்டிய வெந்தயம், பச்சைப்பயறு, தக்காளி, வெங்காயம், உப்பு சேர்த்துக் கலக்கவும். அதன் மீது யோகர்ட் ஊற்றி சாட் மசாலாத்தூள், கொத்தமல்லித்தழை தூவிப் பரிமாறவும்.

குறிப்பு: பயறு வகைகளை ஆவியில் வேகவிட்டு எடுத்தும் சேர்க்கலாம்.


தக்காளி – மணத்தக்காளி ரசம்

தேவை: பழுத்த தக்காளி – 2 (மசிக்கவும்) பாசிப்பருப்பு – 2 டேபிள்ஸ்பூன் மணத்தக்காளி வற்றல் – ஒரு டேபிள்ஸ்பூன் மிளகு – சீரகத்தூள், வெந்தயப் பொடி – தலா ஒரு டீஸ்பூன் பூண்டு – 3 பல் (தட்டவும்) மஞ்சள்தூள் – ஒரு சிட்டிகை கடுகு – அரை டீஸ்பூன் கறிவேப்பிலை, கொத்தமல்லித்தழை – சிறிதளவு பெருங்காயத்தூள் – அரை டீஸ்பூன் காய்ந்த மிளகாய் – ஒன்று எண்ணெய், உப்பு – தேவையான அளவு.

செய்முறை: பாசிப்பருப்புடன் தண்ணீர், மஞ்சள்தூள் சேர்த்து வேகவிட்டு மசிக்கவும் (ஒன்றரை கப் பருப்பு நீர் இருக்க வேண்டும்). வாணலியில் எண்ணெய்விட்டுச் சூடாக்கி கடுகு, காய்ந்த மிளகாய், மணத்தக்காளி வற்றல், கறிவேப்பிலை, பெருங்காயத்தூள் தாளிக்கவும். அதனுடன் தக்காளி, பூண்டு, வெந்தயப் பொடி, பாசிப்பருப்பு தண்ணீர், உப்பு, மிளகு – சீரகத்தூள் சேர்த்து ஒரு கொதிவிட்டு, கொத்தமல்லித்தழைத் தூவி இறக்கவும்.

சிறப்பு: இது வாய்ப்புண், வயிற்றுப்புண்ணை ஆற்றும்.


கீரை மசியல்

தேவை: முளைக்கீரை – அரை கட்டு (ஆய்ந்து, அலசி நறுக்கவும்) பாசிப்பருப்பு – கால் கப் (அரை மணி நேரம் ஊற வைக்கவும்) தக்காளி – ஒன்று (பொடியாக நறுக்கவும்) தோலுரித்து, பொடியாக நறுக்கிய சின்ன வெங்காயம் – கால் கப் பூண்டு – 2 பல் (தட்டவும்) மஞ்சள்தூள் – ஒரு சிட்டிகை கடுகு – அரை டீஸ்பூன் காய்ந்த மிளகாய் – ஒன்று சீரகம் – அரை டீஸ்பூன் எண்ணெய், உப்பு – சிறிதளவு.

செய்முறை: குக்கரில் கீரை, தக்காளி, சின்ன வெங்காயம், பூண்டு, மஞ்சள்தூள், பாசிப்பருப்பு, உப்பு, தேவையான தண்ணீர் சேர்த்து மூடி இரண்டு விசில்விட்டு இறக்கி மத்தால் மசிக்கவும். வாணலியில் எண்ணெய்விட்டுச் சூடாக்கி கடுகு, காய்ந்த மிளகாய், சீரகம் தாளித்து, கீரையுடன் சேர்த்துப் பரிமாறவும்.

குறிப்பு: இதை சாதத்துடன் சேர்த்துப் பிசைந்து சாப்பிடலாம்; பிரெட் அல்லது சப்பாத்தியின் மீது தடவியும் சாப்பிடலாம். அரைக்கீரை, சிறு கீரையிலும் இதைச் செய்யலாம்.


கம்பங்கூழ்

தேவை: கம்பு மாவு – ஒரு கப் மோர் – 2 கப் தோலுரித்துப் பொடியாக நறுக்கிய சின்ன வெங்காயம் – அரை கப் சீரகம் – ஒரு டீஸ்பூன் நல்லெண்ணெய் – சிறிதளவு உப்பு – தேவையான அளவு.

செய்முறை: அடிகனமான வாணலியில் 2 கப் தண்ணீர்விட்டுக் கொதிக்கவிடவும். அதனுடன் உப்பு, நல்லெண்ணெய், கம்பு மாவு சேர்த்துக் கைவிடாமல் கிளறி இறக்கவும். ஆறியதும் சீரகம், மோர் சேர்த்துக் கரைக்கவும். மேலே சின்ன வெங்காயம் சேர்த்துப் பரிமாறவும்.

சிறப்பு: உடல் பலம் பெறும்; குளிர்ச்சி பெறும். குடல்புண், வயிற்றுப்புண்கள், அஜீரணக் கோளாறுகள் குணமாகும்.


பறங்கிக்காய் பாத்

தேவை: தோல் சீவி சதுரமாக நறுக்கிய பறங்கிக்காய், வடித்த சாதம் – தலா ஒரு கப் தோல் சீவிப் பொடியாக நறுக்கிய இஞ்சி – ஒரு டீஸ்பூன் தேங்காய்த் துருவல் – அரை கப் தனியாத்தூள் (மல்லித்தூள்) – அரை டீஸ்பூன் மஞ்சள்தூள் – ஒரு சிட்டிகை கொத்தமல்லித்தழை – ஒரு டேபிள்ஸ்பூன் (அலசி, ஆய்ந்தது) பொடியாக நறுக்கிய சின்ன வெங்காயம் – கால் கப் கறிவேப்பிலை – சிறிதளவு கடுகு – ஒரு டீஸ்பூன் கடலைப்பருப்பு – ஒரு டேபிள்ஸ்பூன் சீரகம் – ஒரு டீஸ்பூன் பச்சை மிளகாய் – 3 (நீளவாக்கில் கீறவும்) வெந்தயம் – அரை டீஸ்பூன் பிரியாணி இலை, கிராம்பு – தலா ஒன்று மிளகாய்த்தூள் – ஒரு டீஸ்பூன் நல்லெண்ணெய், உப்பு – தேவையான அளவு.

செய்முறை: வாணலியில் ஒரு டேபிள்ஸ்பூன் எண்ணெய்விட்டுச் சூடாக்கி கடுகு, கடலைப்பருப்பு, சீரகம் தாளிக்கவும். அதனுடன் கிராம்பு, பிரியாணி இலை, சின்ன வெங்காயம், இஞ்சி, வெந்தயம், கறிவேப்பிலை, பச்சை மிளகாய் சேர்த்து வதக்கவும். பிறகு கால் கப் தேங்காய்த் துருவல், பறங்கிக்காய்த் துண்டுகள், உப்பு, தனியாத்தூள், மஞ்சள்தூள், மிளகாய்த்தூள் சேர்த்து வதக்கவும். சிறிதளவு தண்ணீர் தெளித்து மூடி போட்டு வேகவிடவும். பிறகு அதனுடன் மீதமுள்ள தேங்காய்த் துருவல், கொத்தமல்லித்தழை சேர்த்துக் கிளறி இறக்கவும். பறங்கி மசாலா ரெடி. இதனுடன் சாதம், சிறிதளவு நல்லெண்ணெய் சேர்த்துக் கலக்கவும். தயிர்ப் பச்சடியுடன் பரிமாறவும்.

Advertisements
Posted in படித்ததில் பிடித்தது | Leave a comment

நாட்டு காய்கறி தொகுப்பு

முக்கூட்டு மசியல்

தேவை: தோல், விதை நீக்கி சிறிய துண்டுகளாக நறுக்கிய பரங்கி, பூசணி, சுரைக்காய் கலவை – ஒன்றரை கப் துவரம்பருப்பு, பாசிப்பருப்பு, கடலைப்பருப்பு – தலா 50 கிராம் பொடியாக நறுக்கிய வெங்காயம் – அரை கப் தக்காளி – 2 (பொடியாக நறுக்கவும்) கறிவேப்பிலை – சிறிதளவு கடுகு – ஒரு டீஸ்பூன் மஞ்சள்தூள் – அரை டீஸ்பூன் பெருங்காயத்தூள் – ஒரு சிட்டிகை மிளகாய்த்தூள் – ஒரு டீஸ்பூன் எண்ணெய், உப்பு – தேவையான அளவு. அரைக்க: தேங்காய்த் துருவல் – கால் கப், சீரகம் – 2 டீஸ்பூன் பச்சை மிளகாய் – 3
சோம்பு – அரை டீஸ்பூன்.

செய்முறை: அரைக்கக்கொடுத்துள்ள பொருள்களுடன் தண்ணீர் தெளித்து மிக்ஸியில் விழுதாக அரைத்து எடுக்கவும். பருப்பு வகைகளுடன் தண்ணீர் சேர்த்து அரைமணி நேரம் ஊறவைக்கவும். குக்கரில் பருப்புடன் காய்கறிகள், தேவையான தண்ணீர், உப்பு, மஞ்சள்தூள் சேர்த்து வேகவைத்து எடுக்கவும். வாணலியில் எண்ணெய்விட்டுச் சூடானதும் கடுகு, கறிவேப்பிலை, பெருங்காயத்தூள் தாளிக்கவும். அதனுடன் வெங்காயம், தக்காளி சேர்த்து வதக்கவும். பிறகு அரைத்த விழுது, வேகவைத்த காய்கறிகள், பருப்புக் கலவை, மிளகாய்த்தூள் சேர்த்து ஒரு கொதிவிட்டு கிளறி இறக்கவும்.


மஞ்சள் பூசணி பாயசம்

தேவை: தோல் சீவி, விதை நீக்கி துருவிய மஞ்சள் பூசணி – ஒரு கப் சர்க்கரை – ஒரு கப் பால் – ஒரு லிட்டர் கண்டன்ஸ்டு மில்க் – அரை கப் குங்குமப்பூ – சிறிதளவு தேங்காய்த் துருவல் – கால் கப் ஏலக்காய்த்தூள் – ஒரு சிட்டிகை நெய்யில் வறுத்த பாதாம், முந்திரி – தலா ஒரு டேபிள்ஸ்பூன் நெய் – சிறிதளவு நெய்யில் வறுத்த உலர் பூசணி விதை – ஒரு டீஸ்பூன் வெனிலா எசென்ஸ் – ஒரு துளி.

செய்முறை: வாணலியில் சிறிதளவு நெய்விட்டு பூசணித் துருவல் சேர்த்து வதக்கவும். அதனுடன் பால் ஊற்றி (சிறிதளவு தண்ணீரும் சேர்க்கலாம்) நன்றாக வேகவிடவும். பிறகு ஏலக்காய்த்தூள், சர்க்கரை சேர்த்துக் கிளறவும். அடுப்பை சிறு தீயில் வைத்து தேங்காய்த் துருவல், முந்திரி, பாதாம், கண்டன்ஸ்டு மில்க், குங்குமப்பூ, பூசணி விதை சேர்த்துக் கிளறி இறக்கவும். மேலே வெனிலா எசென்ஸ் விட்டுச் சூடாகவோ அல்லது குளிரவைத்தோ பரிமாறவும். பூசணிக்காய் வயிற்றுப்புண்ணை ஆற்றும்.


சுண்டைக்காய் கொத்சு

தேவை: சுண்டைக்காய் – அரை கப் (நறுக்கி தண்ணீரில் போடவும்) பெருங்காயத்தூள் – அரை டீஸ்பூன் பொடியாக நறுக்கிய சின்ன வெங்காயம் – கால் கப் கடுகு – அரை டீஸ்பூன் தக்காளி – ஒன்று (பொடியாக நறுக்கவும்) மஞ்சள்தூள் – அரை டீஸ்பூன் எள் – ஒரு டேபிள்ஸ்பூன் புளி – எலுமிச்சை அளவு (கரைக்கவும்) கறிவேப்பிலை, கொத்தமல்லித்தழை (அலசி ஆய்ந்தது) – சிறிதளவு எண்ணெய், உப்பு – தேவையான அளவு. அரைக்க: தேங்காய்த் துருவல் – 2 டேபிள்ஸ்பூன் காய்ந்த மிளகாய் – 4 சீரகம் – அரை டீஸ்பூன் தனியா (மல்லி) – ஒரு டீஸ்பூன் கடலைப்பருப்பு – ஒரு டேபிள்ஸ்பூன்.

செய்முறை: வெறும் வாணலியில் எள்ளைச் சேர்த்து வறுத்துப் பொடிக்கவும். அதே வாணலியில் சிறிதளவு எண்ணெய்விட்டு அரைக்கக்கொடுத்துள்ள பொருள்களைச் சேர்த்து வறுத்து எடுக்கவும். ஆறிய பிறகு மிக்ஸியில் விழுதாக அரைக்கவும். வாணலியில் எண்ணெய்விட்டு சின்ன வெங்காயம், தக்காளி சேர்த்து, பிறகு சுண்டைக்காய் சேர்த்து வதக்கவும். பின்பு புளிக்கரைசல், உப்பு, மஞ்சள்தூள் சேர்த்து வேகவிடவும். அதனுடன் அரைத்த விழுது, எள் பொடி சேர்த்துக் கொதிக்கவிடவும். வாணலியில் எண்ணெய் விட்டு கடுகு, கறிவேப்பிலை, பெருங்காயத்தூள் தாளித்து, கொதிக்கும் கலவையில் ஊற்றிக் கிளறி இறக்கி, கொத்தமல்லித்தழை தூவிப் பரிமாறவும். இரும்புச் சத்துமிக்க சுண்டைக்காய் கொத்சு வயிற்றில் கிருமிகள் வராமலும் தடுக்கும்.


ஸ்டஃப்டு வெண்டைக்காய்

தேவை: பிஞ்சு வெண்டைக்காய் – கால் கிலோ (இரு முனைகளையும் நீக்கி, நீளவாக்கில் நடுவே கீறி விதைகளை எடுக்கவும்) இஞ்சி – பூண்டு விழுது – ஒரு டீஸ்பூன் கடலை மாவு, அரிசி மாவு, மைதா மாவு – தலா ஒரு டீஸ்பூன் மஞ்சள்தூள் – ஒரு சிட்டிகை மிளகுத்தூள் – அரை டீஸ்பூன் பொடியாக நறுக்கிய வெங்காயம் – அரை கப் பச்சை மிளகாய் விழுது – ஒரு டீஸ்பூன் தக்காளி – ஒன்று (பொடியாக நறுக்கவும்) எண்ணெய், உப்பு – தேவையான அளவு.

செய்முறை: வாணலியில் எண்ணெய்விட்டு வெங்காயம், தக்காளி, பச்சை மிளகாய் விழுது, இஞ்சி – பூண்டு விழுது, உப்பு சேர்த்து வதக்கவும். ஆறிய பிறகு இந்த மசாலாவைக் கீறிவைத்துள்ள வெண்டைக்காய்க்குள் அடைக்கவும். கடலை மாவுடன் அரிசி மாவு, மைதா மாவு, மஞ்சள்தூள், உப்பு, மிளகுத்தூள், தண்ணீர் சேர்த்து நீர்க்க கரைக்கவும். வாணலியில் எண்ணெயைக் காயவிட்டு ஸ்டப்ஃபிங் செய்த வெண்டைக்காயை மாவில் முக்கி எடுத்துப்போட்டுப் பொரித்தெடுக்கவும் (மெதுவாக திருப்பிப் போட்டு வேகவிடவும்). இதை சாதத்துடன் பரிமாறலாம். அல்லது, சாஸ் தொட்டுத் தனியாகவும் சாப்பிடலாம்.


முருங்கைக்காய் மசாலா

தேவை: முருங்கைக்காய் – 3 (விரல் நீள துண்டுகளாக்கவும்) பொடியாக நறுக்கிய தக்காளி, பொடியாக நறுக்கிய சின்ன வெங்காயம் – தலா அரை கப் மிளகாய்த்தூள் – ஒரு டீஸ்பூன் கரம் மசாலாத்தூள் – அரை டீஸ்பூன் எண்ணெய், உப்பு – தேவையான அளவு. அரைக்க: தனியா (மல்லி) – ஒரு டேபிள்ஸ்பூன், தேங்காய்த் துருவல் – 2 டேபிள்ஸ்பூன் சோம்பு – ஒரு டீஸ்பூன் கடலைப்பருப்பு – ஒரு டீஸ்பூன் வெங்காயம் – ஒன்று (பொடியாக நறுக்கவும்).

செய்முறை: வாணலியில் சிறிதளவு எண்ணெய்விட்டுச் சூடாக்கி அரைக்கக் கொடுத் துள்ள பொருள்களைச் சேர்த்து வறுத்து எடுக்கவும். ஆறிய பிறகு அதனுடன் தண்ணீர்விட்டு நைஸாக அரைத்து எடுக்கவும். வாணலியில் சிறிதளவு எண்ணெய்விட்டுச் சூடாக்கி சின்ன வெங்காயம், தக்காளி சேர்த்து வதக்கவும். அதனுடன் அரைத்த விழுது, உப்பு, மிளகாய்த்தூள், கரம் மசாலாத்தூள் சேர்த்துக் கிளறவும். பிறகு, முருங்கைத் துண்டுகளைப் போட்டு மூழ்கும்வரை தண்ணீர்விட்டு, அடுப்பை மிதமான தீயில் வைத்து, மூடி போட்டு வேகவிடவும். தண்ணீர் வற்றி காய் வெந்த பிறகு இறக்கிப் பரிமாறவும். முருங்கையில் இரும்புச் சத்து, கொழுப்புச் சத்து வைட்டமின் ஏ, சி ஆகியவை உள்ளன. இது நரம்புகளுக்கு நல்லது.


சுரைக்காய் பர்ஃபி

தேவை: தோல், விதை நீக்கி துருவிய சுரைக்காய் – ஒன்றரை கப் தேங்காய்த் துருவல் – அரை கப் மைதா மாவு, பொட்டுக்கடலை மாவு – தலா கால் கப் நெய் – சிறிதளவு பச்சை நிற ஃபுட் கலர் – ஒரு சிட்டிகை ஏலக்காய்த்தூள் – ஒரு டீஸ்பூன் சர்க்கரை – ஒரு கப் கண்டன்ஸ்டு மில்க் – அரை கப் நட்ஸ் துருவல் – 2 டேபிள்ஸ்பூன்.

செய்முறை: சுரைக்காய் துருவலில் நீர் இல்லாமல் ஒட்டப்பிழிந்து ஆவியில் வேகவிட்டு எடுக்கவும். வெறும் வாணலியில் மைதா மாவு சேர்த்துச் சிவக்க வறுத்து எடுக்கவும். அடிகனமான வாணலியில் சர்க்கரையுடன் சிறிதளவு தண்ணீர்விட்டுக் கொதிக்கவிட்டு ஒரு கம்பி பதத்துக்குப் பாகு காய்ச்சவும். அதனுடன் மைதா மாவு, பொட்டுக்கடலை மாவு, நெய், சுரைக்காய்த் துருவல், தேங்காய்த் துருவல் சேர்த்துக் கைவிடாமல் கிளறவும். பிறகு ஃபுட் கலர், நெய், ஏலக்காய்த்தூள், கண்டன்ஸ்டு மில்க் சேர்த்துச் சுருள கிளறி இறக்கி நெய் (அ) வெண்ணெய் தடவிய தட்டில் கொட்டவும். மேலே நட்ஸ் தூவி கொஞ்சம் ஆறியதும் துண்டுகளாக்கிப் பரிமாறவும்.


பாகற்காய் பிட்லை

தேவை: வட்டமாக நறுக்கிய பாகற்காய் – ஒரு கப் வெல்லம் – சிறிதளவு புளி – நெல்லிக்காய் அளவு (ஊறவைத்து கரைக்கவும்) துவரம்பருப்பு – ஒரு கப் தேங்காய்த் துருவல் – 2 டேபிள்ஸ்பூன் பெருங்காயத்தூள் – ஒரு சிட்டிகை மஞ்சள்தூள் – அரை டீஸ்பூன் தேங்காய் எண்ணெய் – சிறிதளவு உப்பு – தேவையான அளவு. அரைக்க: காய்ந்த மிளகாய் – 8 தனியா (மல்லி) – ஒரு டீஸ்பூன் மிளகு, சீரகம் – தலா அரை டீஸ்பூன் தேங்காய்த் துருவல் – கால் கப் எண்ணெய் – சிறிதளவு.

செய்முறை: வாணலியில் எண்ணெய்விட்டு அரைக்கக் கொடுத்துள்ள பொருள்களை சேர்த்து வறுத்து எடுத்து விழுதாக அரைக்கவும். துவரம்பருப்புடன் பெருங்காயத்தூள், சிறிதளவு உப்பு சேர்த்து வேகவிட்டு மசிக்கவும். நறுக்கிய பாகற்காயில் சிறிதளவு உப்பு தூவி அரைமணி நேரம் அப்படியே வைக்கவும். பிறகு, தண்ணீரை வடித்து ஒட்டப்பிழிந்து எடுக்கவும். புளிக்கரைசலுடன் உப்பு, மஞ்சள்தூள் , பாகற்காய் சேர்த்து வேகவிடவும். பிறகு மசித்த பருப்பு, அரைத்த விழுது, வெல்லம் சேர்த்து குழம்பு கெட்டிப்படும் வரை வேகவிடவும். வாணலியில் தேங்காய் எண்ணெய்விட்டு தேங்காய்த் துருவலைச் சேர்த்து வறுத்துக் குழம்பில் சேர்த்துக் கிளறி இறக்கவும். இரும்புச் சத்து மிகுந்தது, இந்தப் பாகற்காய் பிட்லை.


பீர்க்கங்காய் பஜ்ஜி

தேவை: லேசாக தோல் சீவி வட்டமாக நறுக்கிய பீர்க்கங்காய்த் துண்டுகள் – ஒரு கப் கடலை மாவு – ஒரு கப் அரிசி மாவு – அரை கப் மிளகாய்த்தூள் – ஒரு டீஸ்பூன் ஓமம் – அரை டீஸ்பூன் இஞ்சி – பூண்டு விழுது – ஒரு டீஸ்பூன் பெருங்காயத்தூள், மஞ்சள்தூள் – தலா ஒரு சிட்டிகை எண்ணெய், உப்பு – தேவையான அளவு.

செய்முறை: கடலை மாவுடன் அரிசி மாவு, உப்பு, மிளகாய்த்தூள், பெருங்காயத்தூள், மஞ்சள்தூள், ஓமம், இஞ்சி – பூண்டு விழுது சேர்த்துக் கலக்கவும். அதனுடன் தேவையான அளவு தண்ணீர்விட்டு தோசை மாவுப் பதத்துக்குக் கரைக்கவும். வாணலியில் எண்ணெயைக் காயவிட்டு பீர்க்கங்காய் துண்டுகளை மாவில் முக்கி எடுத்துப் போட்டுப் பொரித்தெடுக்கவும். பீர்க்கங்காயில் நீர்ச்சத்து உள்ளதால் உடல் உஷ்ணத்தைத் தணிக்கும்.


நாட்டுக் காய்கறிக் கலவை ஊறுகாய்

தேவை: பொடியாக நறுக்கிய, விருப்பமான நாட்டுக் காய்கறிகள் கலவை (மாங்காய், கொத்தவரை, பூண்டு என சேர்க்கலாம்) – 2 கப் மிளகாய்த்தூள் – 50 கிராம் கடுகு – ஒரு டீஸ்பூன் எலுமிச்சைப் பழம் – 3 வெந்தயப்பொடி – அரை டீஸ்பூன் சீரகத்தூள் – ஒரு டீஸ்பூன் மஞ்சள்தூள் – அரை டீஸ்பூன் எண்ணெய் – 100 மில்லி உப்பு – தேவையான அளவு.

செய்முறை: காய்கறிகளை ஆவியில் வேகவைத்து எடுக்கவும். பிறகு சுத்தமான துணியில் உலரவிடவும். எலுமிச்சைப் பழத்தைப் பிழிந்து சாறு எடுத்து வடிகட்டவும். அதனுடன் உப்பு, மிளகாய்த்தூள் சேர்த்துக் கலக்கவும். ஈரமில்லாத பாத்திரத்தில் காய்கறிக் கலவை, எலுமிச்சைக் கலவையைச் சேர்க்கவும். வாணலியில் எண்ணெய்விட்டு கடுகு தாளித்து, காய்கறிக் கலவையுடன் சேர்க்கவும். மேலே வெந்தயப்பொடி, சீரகத்தூள் சேர்த்துக் கிளறி, காற்றுப்புகாத பாட்டிலில் கைபடாமல் ஸ்பூனால் எடுத்துப் போட்டுச் சேகரிக்கவும். நன்கு குலுக்கிவிடவும். இதை ஒரு வாரம் வரை வைத்துப் பயன்படுத்தலாம். இரும்புச் சத்து மிகுந்த இந்த ஊறுகாயைப் பரிமாறும்முன் ஒவ்வொரு முறையும் நன்கு கிளறிவிட்டுப் பரிமாறவும்.


வெள்ளைப் பூசணி – பயறு கூட்டு

தேவை: விதை, தோல் நீக்கி சதுர துண்டுகளாக்கிய பூசணி – ஒரு கப் முளைகட்டிய பச்சைப் பயறு – கால் கப் கொத்தமல்லித்தழை, கறிவேப்பிலை – சிறிதளவு தேங்காய் எண்ணெய் – ஒரு டேபிள்ஸ்பூன் உப்பு – தேவையான அளவு. தாளிக்க: கடுகு – சீரகம் – தலா அரை டீஸ்பூன் சின்ன வெங்காயம் – 4 (பொடியாக நறுக்கவும்).

அரைக்க: தேங்காய்த் துருவல் – கால் கப் சோம்பு – அரை டீஸ்பூன் பச்சை மிளகாய் – 4.

செய்முறை: அரைக்கக்கொடுத்துள்ள பொருள்களை விழுதாக அரைத்து எடுக்கவும். வாணலியில் தேவையான அளவு தண்ணீர்விட்டு முளைகட்டிய பச்சைப் பயறு சேர்த்து வேகவிடவும், பாதி வெந்ததும் பூசணித் துண்டுகளைச் சேர்த்து வேகவிடவும். அதனுடன் அரைத்த விழுது, உப்பு சேர்த்துக் கொதிக்கவிடவும். மற்றொரு வாணலியில் தாளிக்கக்கொடுத்துள்ள பொருள்களைச் சிறிதளவு தேங்காய் எண்ணெயில் தாளித்து கூட்டுடன் சேர்க்கவும். கறிவேப்பிலை, கொத்தமல்லித்தழை தூவி இறக்கவும். மேலே மீதமுள்ள தேங்காய் எண்ணெய் சேர்த்துச் சாதத்துடன் பரிமாறவும். பூசணி வயிற்றுப் புண்ணில் இருந்து நிவாரணம் அளிக்கும்.


பரங்கிக்காய் சட்னி

தேவை: தோல், விதை நீக்கி சதுரமாக நறுக்கிய பரங்கிக்காய் – ஒரு கப் தேங்காய்த் துருவல் – கால் கப் புளி – சிறிதளவு வெங்காயம், தக்காளி – தலா ஒன்று (பொடியாக நறுக்கவும்) பச்சை வேர்க்கடலை – 2 டேபிள்ஸ்பூன் தோல் சீவிய இஞ்சி – கால் இன்ச் துண்டு பூண்டு – 2 பல் கடுகு – அரை டீஸ்பூன் கறிவேப்பிலை – சிறிதளவு எண்ணெய், உப்பு – தேவையான அளவு.

செய்முறை: வாணலியில் எண்ணெய்விட்டு வெங்காயம், பரங்கிக்காய், தக்காளி, பூண்டு, உப்பு சேர்த்து வதக்கி ஆறவிடவும். அதனுடன் தேங்காய்த் துருவல், புளி, வேர்க்கடலை, இஞ்சி சேர்த்து தண்ணீர்விட்டு மிக்ஸியில் நைஸாக அரைத்து எடுக்கவும். வாணலியில் எண்ணெய்விட்டு கடுகு, கறிவேப்பிலை தாளித்து சட்னியுடன் கலந்து பரிமாறவும்.


மிக்ஸ்டு நாட்டுக் காய்கறி அவியல்

தேவை: நாட்டுக் காய்கறிகள் கலவை (தோல், விதை நீக்கி நீளவாக்கில் நறுக்கியது) – ஒரு கப் (வாழைக்காய், பூசணி, முருங்கை, புடலை இப்படி சேர்த்துக்கொள்ளலாம்) கெட்டித் தயிர் – ஒரு கப் காய்ந்த மிளகாய் – 3 கறிவேப்பிலை – சிறிதளவு கடுகு – ஒரு டீஸ்பூன் தேங்காய் எண்ணெய் – 3 டேபிள்ஸ்பூன் உப்பு – சிறிதளவு வாழை இலை – பாத்திரத்தை மூடிவைக்க தேவையான அளவு. அரைக்க: தேங்காய்த் துருவல் – ஒரு கப் சீரகம் – ஒரு டீஸ்பூன் பச்சை மிளகாய் – 2 பச்சரிசி – 2 டேபிள்ஸ்பூன் (15 நிமிடங்கள் தண்ணீரில் ஊறவைக்கவும்) உப்பு – தேவையான அளவு.

செய்முறை: அரைக்கக்கொடுத்துள்ள பொருள்களுடன் தண்ணீர் சேர்த்து மிக்ஸியில் அரைத்து எடுக்கவும். குக்கரில் காய்கறிகளுடன் தேவையான அளவு தண்ணீர், உப்பு சேர்த்து 2 விசில்விட்டு இறக்கவும். வாணலியில் கொஞ்சம் தேங்காய் எண்ணெய்விட்டுச் சூடானதும் கடுகு, மிளகாய், கறிவேப்பிலை சேர்த்து தாளிக்கவும். அதனுடன் காய்கறி கலவை, தயிர், அரைத்த விழுது சேர்த்து, அடுப்பை சிறு தீயில் வைத்துக் கிளறி ஒரு கொதிவிட்டு இறக்கவும். மீதமுள்ள தேங்காய் எண்ணெயைச் சூடாக்கி சேர்த்து நன்கு கலக்கவும். இதை வேறு பாத்திரத்துக்கு மாற்றி வாழை இலையால் மூடவும். பிறகு, அதன்மீது மற்றொரு மூடியை வைக்கவும். 15-20 நிமிடங்கள் அப்படியே விட்டுவிடவும். பிறகு பரிமாறவும். தேங்காய் எண்ணெய் மற்றும் வாழை இலை மணத்துடன் காய்கறி அவியல் மிகவும் சுவையாக இருக்கும்.


கொத்தவரங்காய் – பருப்பு உசிலி

தேவை: பொடியாக நறுக்கிய கொத்தவரங்காய் – ஒரு கப் பாசிப்பருப்பு, கடலைப்பருப்பு, துவரம்பருப்பு (சேர்ந்து) – கால் கப் காய்ந்த மிளகாய் – 4 கடுகு – அரை டீஸ்பூன் கறிவேப்பிலை – சிறிதளவு நறுக்கிய கொத்தமல்லித்தழை – ஒரு டேபிள்ஸ்பூன் உடைத்த உளுத்தம்பருப்பு – அரை டீஸ்பூன் எண்ணெய், உப்பு – தேவையான அளவு.

செய்முறை: பருப்பு வகைகளுடன் மிளகாய் சேர்த்து 15 நிமிடங்கள் ஊறவைக்கவும். பிறகு, தண்ணீரை வடித்துவிட்டு மிக்ஸியில் ஒரு சுற்றுவிட்டு எடுக்கவும். கொத்தவரங்காய், அரைத்த பருப்புக் கலவையைத் தனித்தனியாக ஆவியில் வேகவிட்டு எடுக்கவும். வெந்த பருப்புக் கலவையை மீண்டும் மிக்ஸியில் ஒரு சுற்றுவிட்டு எடுக்கவும். வாணலியில் எண்ணெய்விட்டு கடுகு, உளுத்தம்பருப்பு, கறிவேப்பிலை தாளிக்கவும். அதனுடன் வேகவைத்த கொத்தவரங்காய், உப்பு, அரைத்த பருப்பு சேர்த்துக் கிளறவும். மேலே கொத்தமல்லித்தழை தூவி இறக்கிப் பரிமாறவும். சாதத்துக்குத் தொட்டு சாப்பிடலாம். பிரெட், சப்பாத்தி நடுவே வைத்தும் சாப்பிடலாம்.


வாழைப்பூ அடை

தேவை: இட்லி அரிசி, துவரம்பருப்பு, கடலைப்பருப்பு, ஆய்ந்து நறுக்கிய வாழைப்பூ – தலா ஒரு கப் மஞ்சள்தூள், பெருங்காயத்தூள் – தலா ஒரு சிட்டிகை காய்ந்த மிளகாய் – 8 கறிவேப்பிலை – சிறிதளவு தோல் சீவி பொடியாக நறுக்கிய இஞ்சி – ஒரு டீஸ்பூன் கடுகு, உடைத்த உளுத்தம்பருப்பு – தலா அரை டீஸ்பூன் நறுக்கிய சின்ன வெங்காயம் – அரை கப் எண்ணெய், உப்பு – தேவையான அளவு.

செய்முறை: அரிசியுடன் துவரம்பருப்பு, கடலைப்பருப்பு, 6 மிளகாய் சேர்த்து இரண்டு மணி நேரம் ஊறவைத்துக் கொரகொரப்பாக அரைத்து எடுக்கவும். அதனுடன் உப்பு சேர்த்துக் கலக்கவும். வாணலியில் எண்ணெய்விட்டு கடுகு, உளுத்தம்பருப்பு, கறிவேப்பிலை, மீதமுள்ள மிளகாய் சேர்த்து தாளிக்கவும். அதனுடன் சின்ன வெங்காயம், பெருங்காயத்தூள், இஞ்சி, மஞ்சள்தூள், வாழைப்பூ, உப்பு சேர்த்து வதக்கி மாவுடன் கலக்கவும். தோசைக்கல்லைக் காயவைத்து எண்ணெய் தடவி, மாவை அடைகளாக ஊற்றி, சுற்றிலும் எண்ணெய்விட்டு இருபுறமும் வேகவைத்து எடுக்கவும்.


வெண்டை – சுண்டை சூப்

தேவை: பிஞ்சு வெண்டைக்காய் – 3 (பொடியாக நறுக்கவும்) சுண்டைக்காய் – 6 (இரண்டாக நறுக்கவும்) பச்சை மிளகாய் – ஒன்று (இரண்டாகக் கீறவும்) மிளகுத்தூள் – ஒரு டீஸ்பூன் துவரம்பருப்பு வேகவைத்த நீர் – ஒரு கப் சீரகத்தூள் – அரை டீஸ்பூன் நறுக்கிய கொத்தமல்லித்தழை – சிறிதளவு வெண்ணெய் – ஒரு டேபிள்ஸ்பூன் லவங்கம் – ஒன்று பட்டை – சிறிய துண்டு எண்ணெய், உப்பு – தேவையான அளவு.

செய்முறை: வாணலியில் எண்ணெய்விட்டுச் சூடானதும் பட்டை, லவங்கம், பச்சை மிளகாய் சேர்த்து வதக்கவும். அதனுடன் வெண்டைக்காய், சுண்டைக்காய் சேர்த்து வதக்கி உப்பு, பருப்பு வேகவைத்த நீர், சேர்த்து ஒரு கொதிவிடவும். பிறகு மிளகுத்தூள், சீரகத்தூள் சேர்த்து இறக்கவும். மேலே கொத்தமல்லித்தழை தூவி, வெண்ணெய் ஒரு டேபிள்ஸ்பூன் விட்டுச் சூடாகப் பரிமாறவும். இரும்புச் சத்து மிகுந்தது, இந்த சூப்.


வாழைத்தண்டு ரசம்

தேவை: வாழைத்தண்டு (சிறியது) – ஒன்று (பொடியாக நறுக்கவும்) ரசப்பொடி – 2 டீஸ்பூன் மஞ்சள்தூள் – ஒரு சிட்டிகை துவரம்பருப்பு, பாசிப்பருப்பு – தலா ஒரு டேபிள்ஸ்பூன் கறிவேப்பிலை, கொத்தமல்லி – சிறிதளவு எலுமிச்சைப் பழம் – அரை மூடி (சாறு எடுக்கவும்) பெருங்காயத்தூள் – ஒரு சிட்டிகை தக்காளி – 2 (பொடியாக நறுக்கவும்) வெந்தயப்பொடி, கடுகு – தலா அரை டீஸ்பூன் எண்ணெய், உப்பு – தேவையான அளவு.

செய்முறை: துவரம்பருப்புடன் பாசிப்பருப்பு, மஞ்சள்தூள், தேவையான அளவு தண்ணீர்விட்டு வேகவைத்து மசிக்கவும். பாதி வாழைத்தண்டை மிக்ஸியில் போட்டு அரைத்து வடிகட்டி சாறு எடுக்கவும். பருப்புடன் வாழைத்தண்டு சாறு, தக்காளி, மீதமுள்ள வாழைத்தண்டு, உப்பு, பெருங்காயத்தூள், ரசப்பொடி சேர்த்து நன்கு கரைத்துக் கொதிக்கவிடவும். வாணலியில் எண்ணெய்விட்டு கடுகு, கறிவேப்பிலை, வெந்தயப்பொடி தாளித்து ரசத்தில் சேர்த்து ஒரு கொதிவிட்டு, எலுமிச்சைச் சாறு கலந்து இறக்கவும். மேலே கொத்தமல்லித்தழை தூவிப் பரிமாறவும்.


நாட்டுக் காய்கறிகள் மசாலா சாட்

தேவை: துண்டுகளாக நறுக்கிய நாட்டுக் காய்கறிகள் கலவை – ஒரு கப் சாட் மசாலாத்தூள் – 2 டீஸ்பூன் ரெடிமேட் சிவப்பு இனிப்பு சட்னி – ஒரு டேபிள்ஸ்பூன் ரெடிமேட் கிரீன் சட்னி – ஒரு டேபிள்ஸ்பூன் வெங்காயம், தக்காளி – தலா 2 (பொடியாக நறுக்கவும்) நறுக்கிய கொத்தமல்லித்தழை – 2 டேபிள்ஸ்பூன் ஓமப்பொடி (ஸ்நாக்ஸ் வகை) உப்பு – தேவையான அளவு.

செய்முறை: காய்கறிகள் கலவையை ஆவியில் வேகவிட்டு எடுக்கவும். அகலமான பாத்திரத்தில் காய்கறிகளுடன் உப்பு, தக்காளி, கிரீன் சட்னி, இனிப்பு சட்னி சேர்த்துக் கிளறவும். பிறகு கொத்தமல்லித்தழை, வெங்காயம், சாட் மசாலாத்தூள் தூவிக் கிளறவும். இரும்புச் சத்து மிகுந்த இந்த மசாலா சாட் பரிமாறும்போது ஓமப்பொடி தூவவும்.


மாங்காய் தால்

தேவை: மாங்காய்த் துருவல் – ஒரு கப் பாசிப்பருப்பு, துவரம்பருப்பு (சேர்த்து) – அரை கப் மஞ்சள்தூள் – ஒரு சிட்டிகை பெருங்காயத்தூள் – ஒரு சிட்டிகை கடுகு – ஒரு டீஸ்பூன் கறிவேப்பிலை – சிறிதளவு பச்சை மிளகாய் – 3 (பொடியாக நறுக்கவும்) நறுக்கிய கொத்தமல்லித்தழை – ஒரு டேபிள்ஸ்பூன் எண்ணெய், நெய், உப்பு – தேவையான அளவு.

செய்முறை: துவரம்பருப்புடன் பாசிப்பருப்பு, மஞ்சள்தூள், பெருங்காயத்தூள், உப்பு சேர்த்துத் தேவையான அளவு தண்ணீர்விட்டு வேகவைத்து எடுத்து மசிக்கவும். வாணலியில் எண்ணெய், நெய்விட்டு கடுகு, கறிவேப்பிலை தாளிக்கவும். அதனுடன் மாங்காய்த் துருவல், பச்சை மிளகாய் சேர்த்து வதக்கவும். பிறகு, சிறிதளவு தண்ணீர்விட்டுக் கொதிக்கவிடவும். அதனுடன் பருப்புக் கடைசல் சேர்த்துக் கலந்து கொத்தமல்லித்தழை தூவி இறக்கவும். சப்பாத்தி, நாண் வகைகளுக்குத் தொட்டுக்கொள்ளலாம். சாதத்திலும் சேர்ந்து சாப்பிடலாம். மாங்காய் நார்சத்து உள்ள காயாகும். பசியைத் தூண்டும்.


துவரை மசாலா சுண்டல்

தேவை: உரித்த பச்சை துவரை – ஒரு கப் சாட் மசாலாத்தூள் – அரை டீஸ்பூன் கடுகு – அரை டீஸ்பூன் கறிவேப்பிலை – சிறிதளவு உடைத்த உளுத்தம்பருப்பு – ஒரு டீஸ்பூன் காய்ந்த மிளகாய் – 2 எலுமிச்சைப் பழம் – பாதியளவு (சாறு எடுக்கவும்) உப்பு, எண்ணெய் – தேவையான அளவு. அரைக்க: தேங்காய்த் துருவல் – கால் கப் தோல் சீவிய இஞ்சி – கால் இஞ்ச் துண்டு சோம்பு – அரை டீஸ்பூன் கொத்தமல்லித்தழை – கால் கப் (அலசி ஆய்ந்தது) பூண்டு – 2 பல் எள் – ஒரு டீஸ்பூன் பச்சை மிளகாய் – ஒன்று.

செய்முறை: துவரையைத் தண்ணீரில் ஒருமணி நேரம் ஊறவிட்டு, குக்கரில் குழையாமல் வேகவிட்டு எடுக்கவும். அரைக்கக்கொடுத்துள்ள பொருள்களுடன் சிறிதளவு தண்ணீர்விட்டு நைஸாக அரைத்து எடுக்கவும். வாணலியில் எண்ணெய்விட்டுச் சூடானதும் கடுகு, கறிவேப்பிலை, உளுத்தம்பருப்பு, காய்ந்த மிளகாய் தாளிக்கவும். அதனுடன் அரைத்த விழுது சேர்த்து வதக்கி, துவரையைப் சேர்த்துப் புரட்டி சாட் மசாலாத்தூள், உப்பு, எலுமிச்சைச் சாறு சேர்த்துக் கிளறி இறக்கிப் பரிமாறவும்.


வாழைக்காய்ப் பொடி

தேவை: நாட்டு வாழைக்காய் – 2 புளி – நெல்லிக்காய் அளவு முழு வெள்ளை உளுத்தம்பருப்பு – அரை கப் காய்ந்த மிளகாய் – 6 பூண்டு – 3 பல் பெருங்காயத்தூள் – ஒரு சிட்டிகை சுக்குப் பொடி – அரை டீஸ்பூன் எண்ணெய், உப்பு – தேவையான அளவு.

செய்முறை: வாழைக்காயைத் தோலோடு தீயில் சுட்டு எடுக்கவும். பிறகு தோல் நீக்கி, பொடியாக நறுக்கவும். வாணலியில் சிறிதளவு எண்ணெய்விட்டுக் காய்ந்ததும் உளுத்தம்பருப்பு, பெருங்காயத்தூள், காய்ந்த மிளகாய், சுக்குப் பொடி, பூண்டு, உப்பு சேர்த்து வறுத்து எடுக்கவும். ஆறிய பிறகு புளி சேர்த்து மிக்ஸியில் பொடியாக அரைக்கவும். அதனுடன் வாழைக்காய் சேர்த்து ஒரு சுற்றுச்சுற்றி எடுக்கவும். எலும்புகளுக்கு உறுதி தரக்கூடிய சத்தான, சுவையான பொடி தயார். இதைச் சூடான சாதத்தில் போட்டு நல்லெண்ணெய் சேர்த்துப் பிசைந்து சாப்பிடலாம். பொரியல் செய்யும்போது இந்தப் பொடியை ஒரு டீஸ்பூன் சேர்த்துக் கிளறி இறக்கலாம்.


அவரை – துவரைப் பொரியல்

தேவை: நாட்டு அவரைக்காய் – 100 கிராம் (பொடியாக நறுக்கவும்) மிளகாய்த்தூள் – ஒரு டீஸ்பூன் உரித்த பச்சை துவரை – 50 கிராம் மஞ்சள்தூள் – அரை டீஸ்பூன் நறுக்கிய வெங்காயம் – அரை கப் மல்லித்தூள் (தனியாத்தூள்) – ஒரு டீஸ்பூன் தேங்காய்த் துருவல் – கால் கப் தக்காளி – ஒன்று கொத்தமல்லித்தழை – சிறிதளவு உப்பு, எண்ணெய் – தேவையான அளவு. தாளிக்க: கடுகு – ஒரு டீஸ்பூன் காய்ந்த மிளகாய் – 2 கறிவேப்பிலை – சிறிதளவு உளுத்தம்பருப்பு – அரை டீஸ்பூன்.

செய்முறை: தக்காளியை வெந்நீரில் போட்டுச் சில நிமிடங்கள் கழித்து எடுத்துத் தோலை நீக்கி மிக்ஸியில் அரைத்து வடிகட்டவும். துவரையை அரை மணி நேரம் தண்ணீரில் ஊறவைத்து, சிறிதளவு உப்பு சேர்த்து வேகவிட்டு எடுக்கவும். வாணலியில் எண்ணெய்விட்டுச் சூடானதும் கடுகு, உளுத்தம்பருப்பு, காய்ந்த மிளகாய், கறிவேப்பிலை தாளிக்கவும். அதனுடன் வெங்காயம், தக்காளிச் சாறு, உப்பு சேர்த்து வதக்கவும். பிறகு அவரைக்காய், மிளகாய்த்தூள், மஞ்சள்தூள், மல்லித்தூள் சேர்த்துக் கிளறவும். அதனுடன் வெந்த துவரையைச் சேர்த்துக் கிளறி தேங்காய்த் துருவல், கொத்தமல்லித்தழை தூவி இறக்கவும். இதை சாதத்தில் போட்டுப் பிசைந்து சாப்பிடலாம்.


புடலை மசாலா பாத்

தேவை: நறுக்கிய புடலங்காய் – ஒரு கப் நறுக்கிய பீர்க்கங்காய் – கால் கப் பாஸ்மதி அரிசி – ஒரு கப் மஞ்சள்தூள் – அரை டீஸ்பூன் வெங்காயம் – ஒன்று (நீளவாக்கில் நறுக்கவும்) கொத்தமல்லித்தழை – ஒரு டேபிள் ஸ்பூன் எண்ணெய், உப்பு – தேவையான அளவு. அரைக்க: பச்சை மிளகாய் – 2 பூண்டு – 3 பல் தேங்காய்த் துருவல் – கால் கப் சீரகம் – ஒரு டீஸ்பூன் சோம்பு, ஓமம் – தலா அரை டீஸ்பூன். தாளிக்க: கடுகு – அரை டீஸ்பூன் கடலைப்பருப்பு, உளுத்தம்பருப்பு – தலா ஒரு டீஸ்பூன் காய்ந்த மிளகாய் – 2 கறிவேப்பிலை – சிறிதளவு.

செய்முறை: வாணலியில் சிறிதளவு எண்ணெய்விட்டுச் சூடானதும் அரைக்கக் கொடுத்துள்ள பொருள்களைச் சேர்த்து வறுத்து மிக்ஸியில் பொடித்து எடுக்கவும். அரிசியுடன் தேவையான அளவு தண்ணீர்விட்டு உதிர் உதிராக வடித்து எடுக்கவும். அதே வாணலியில் சிறிதளவு எண்ணெய்விட்டுச் சூடானதும் தாளிக்கக்கொடுத்துள்ள பொருள்களைத் தாளிக்கவும். அதனுடன் வெங்காயம், புடலங்காய் சேர்த்து வதக்கவும். பிறகு பீர்க்கங்காய், மஞ்சள்தூள், உப்பு சேர்த்து வதக்கி வேகவிடவும். காய் வெந்த பிறகு அரைத்த விழுது, கொத்தமல்லித்தழை தூவி இறக்கி ஆறவிடவும். இந்த மசாலாவைச் சாதத்தில் சேர்த்துக் கிளறி பரிமாறவும். புடலங்காய் புரதச்சத்து நிறைந்தது.


கத்திரி – முருங்கைக் கறி

தேவை: முருங்கைக்காய்த் துண்டுகள் – ஒரு கப் புளி – எலுமிச்சை அளவு நீளவாக்கில் நறுக்கிய கத்திரிக்காய் – ஒரு கப் தேங்காய்த் துருவல் – கால் கப் நீளவாக்கில் நறுக்கிய வெங்காயம் – அரை கப் நெய் – சிறிதளவு கடுகு – ஒரு டீஸ்பூன் கறிவேப்பிலை – சிறிதளவு எண்ணெய், உப்பு – தேவையான அளவு. வாங்கிபாத் பவுடர் செய்ய: காய்ந்த மிளகாய் – 5 மல்லி (தனியா) , கடலைப்பருப்பு, வெந்தயம் – தலா ஒரு டீஸ்பூன் பெருங்காயத்தூள் – ஒரு சிட்டிகை பட்டை – சிறிய துண்டு மஞ்சள்தூள் – ஒரு சிட்டிகை.

செய்முறை: புளியைத் தண்ணீரில் ஊறவைத்துக் கெட்டியாகக் கரைக்கவும். வாணலியில் நெய்விட்டுச் சூடானதும் வாங்கிபாத் பவுடர் செய்யக் கொடுத்துள்ள பொருள்களைச் சேர்த்து வறுக்கவும். ஆறிய பிறகு உப்பு சேர்த்து மிக்ஸியில் பவுடராக அரைத்து எடுக்கவும். வாணலியில் எண்ணெய்விட்டுச் சூடானதும் கடுகு, கறிவேப்பிலை தாளிக்கவும். அதனுடன் வெங்காயம், முருங்கை, கத்திரிக்காய் சேர்த்து நன்கு வதக்கவும். பிறகு புளிக்கரைசல், உப்பு சேர்த்துக் கிளறி மூடி, குறைந்த தீயில் வேகவிடவும். காய்கள் நன்கு வெந்து தண்ணீர் வற்றியவுடன் வாங்கிபாத் பவுடர், தேங்காய்த் துருவல் சேர்த்துக் கிளறி இறக்கவும். இரும்புச் சத்து மிகுந்த உணவு இது.


கொத்தவரங்காய் வற்றல்

தேவை: கொத்தவரங்காய் – கால் கிலோ உப்பு – தேவையான அளவு மஞ்சள்தூள் – ஒரு டீஸ்பூன்.

செய்முறை: கொத்தவரங்காயின் இரு ஓரங்களையும் நீக்கவும். பிறகு அலசி உப்பு, மஞ்சள்தூள், மூழ்கும் அளவு தண்ணீர்விட்டு கொதிக்கவிடவும். கொத்தவரங்காய் நன்கு வெந்ததும் இறக்கி வடிகட்டவும். இதை வெயிலில் நன்கு காயவிடவும் (முறுகலாக உடையும் பதம் வரை காயவிடவும்). பிறகு, காற்றுப்புகாத டப்பாவில் சேகரிக்கவும். இதை வற்றல் குழம்பு செய்யும்போது சேர்க்கலாம். அல்லது, தனியாக எண்ணெயில் பொரித்து ரசம் சாதம், மோர் சாதத்துக்கு தொட்டுக்கொள்ளலாம். கொத்தவரங்காய் நீரிழிவைக் கட்டுப்படுத்தும்.


பாகற்காய் – கோதுமை புலாவ்

தேவை: விதை நீக்கி, பொடியாக நறுக்கிய பாகற்காய் – ஒரு கப் கோதுமை ரவை – ஒரு கப் சிறிய பச்சை மிளகாய் – 3 (பொடியாக நறுக்கவும்) பட்டை – சிறிய துண்டு கடுகு – ஒரு டீஸ்பூன் கிராம்பு, ஏலக்காய் – தலா 2 பிரியாணி இலை – ஒன்று இஞ்சி – பூண்டு விழுது – ஒரு டீஸ்பூன் மஞ்சள்தூள் – ஒரு சிட்டிகை பொடியாக நறுக்கிய வெங்காயம், தக்காளி (சேர்த்து) – கால் கப் உப்பு, நெய், எண்ணெய் – தேவையான அளவு.

செய்முறை: வாணலியில் நெய், எண்ணெய்விட்டுச் சூடானதும் பட்டை, கிராம்பு, ஏலக்காய், பிரியாணி இலை தாளிக்கவும். அதனுடன் இஞ்சி – பூண்டு விழுது, வெங்காயம், தக்காளி சேர்த்து வதக்கவும். பிறகு பாகற்காய், உப்பு, மஞ்சள்தூள் சேர்த்து வதக்கி, தேவையான அளவு தண்ணீர்விட்டு கொதிக்கவிடவும். அதனுடன் வறுத்த கோதுமை ரவையைச் சேர்த்துக் கிளறி, சிறிதளவு நெய்விட்டுக் கிளறவும். மற்றொரு வாணலியில் எண்ணெய்விட்டு கடுகு, பச்சை மிளகாய் தாளித்து புலாவில் சேர்த்துக் கிளறி இறக்கவும். இரும்புச் சத்துமிக்க இந்த புலாவ் அனைத்து வயதினருக்கும் ஏற்றது.

Posted in படித்ததில் பிடித்தது | Leave a comment

30 வகை வெரைட்டி சமையல்

முளைகட்டிய கோதுமை இனிப்புப் புட்டு

தேவை: கோதுமை – ஒரு கப் நாட்டுச் சர்க்கரை – தேவையான அளவு நெய் – சிறிதளவு தேங்காய்த் துருவல் – தேவையான அளவு.

செய்முறை: கோதுமையை 10 மணி நேரம் ஊறவைத்து முளைகட்டவும். முளைத்த கோதுமையைச் சுத்தமான துணியில் பரப்பி வெயிலில் நன்கு காயவிடவும். வெறும் வாணலியில் கோதுமையைச் சிறிது சிறிதாகப் போட்டு, படபடவென வெடிக்கும் வரை வறுத்தெடுக்கவும். ஆறிய பிறகு மிக்ஸியில் சேர்த்துப் புட்டு மாவுப் பதத்துக்கு அரைத்தெடுக்கவும். அதில் லேசாக தண்ணீர் தெளித்துப் பிசிறி ஆவியில் வேகவிட்டு எடுக்கவும். அதனுடன் தேங்காய்த் துருவல், நெய், நாட்டுச் சர்க்கரை சேர்த்துக் கலந்து பரிமாறவும்.


புதினா பொடி புலாவ்

தேவை: புதினா பொடி செய்ய: புதினா – ஒரு கட்டு கறுப்பு உளுத்தம்பருப்பு – 100 கிராம் பெருங்காயத்தூள் – ஒரு சிட்டிகை காய்ந்த மிளகாய் – தேவையான அளவு எண்ணெய் – 2 டீஸ்பூன் உப்பு – தேவையான அளவு. புலாவ் செய்ய: பாசுமதி அரிசி சாதம் – ஒரு கப் வேகவைத்த பச்சைப் பட்டாணி – ஒரு கைப்பிடி அளவு நெய் – ஒரு டேபிள்ஸ்பூன் பூண்டு – 5 பல் (பொடியாக நறுக்கவும்) பெரிய வெங்காயம் – ஒன்று (பொடியாக நறுக்கவும்) உப்பு – தேவையான அளவு.
செய்முறை: புதினாவை நன்கு அலசி ஒரு துணியில் பரப்பி ஈரம் போக உலரவிடவும். வாணலியில் கறுப்பு உளுந்தைச் சேர்த்து வாசனை வரும்வரை வறுக்கவும். அதனுடன் பெருங்காயத்தூள், உப்பு, காய்ந்த மிளகாய் சேர்த்துப் புரட்டி இறக்கவும். அதே வாணலியில் 2 டீஸ்பூன் எண்ணெய்விட்டு புதினா சேர்த்து, அடுப்பை சிறு தீயில் வைத்து இரண்டு நிமிடங்கள் வதக்கி எடுக்கவும். ஆறியதும் உளுந்து கலவையுடன் சேர்த்து மிக்ஸியில் பொடியாக அரைத்தெடுக்கவும். புதினா பொடி ரெடி. அதே வாணலியில் சிறிதளவு நெய்விட்டு பூண்டு, வெங்காயம் சேர்த்து வதக்கவும். அதனுடன் வேகவைத்த பட்டாணி சேர்த்து இறக்கவும். இதை ஆறிய சாதத்துடன் சேர்த்து உப்பு, புதினா பொடி சேர்த்து சாதம் உடையாமல் நன்கு புரட்டிவிடவும்.

குறிப்பு: பொடியில் உப்பு இருப்பதால் சாதத்துடன் உப்பைக் கவனமாகச் சேர்க்கவும். பொடியை அவரவர் விருப்பத்துக்கேற்ப சேர்த்துக்கொள்ளலாம்.


முருங்கைக்கீரை சூப்

தேவை:
சுத்தம் செய்த முருங்கைக்கீரை – ஒரு கப் சீரகம் – ஒரு டீஸ்பூன் பூண்டு – 5 பல்
தோலுரித்த சின்ன வெங்காயம் – 6 தக்காளி – ஒன்று (பொடியாக நறுக்கவும்) கறிவேப்பிலை, மஞ்சள்தூள் – சிறிதளவு தேங்காய்ப்பால் – ஒரு கப் மிளகுத்தூள், உப்பு – தேவையான அளவு.
செய்முறை: வெங்காயம், சீரகம், பூண்டு, தக்காளி, கறிவேப்பிலை ஆகியவற்றை மிக்ஸியில் சேர்த்துத் தண்ணீர் தெளித்து நைஸாக அரைத்தெடுக்கவும். குக்கரில் கழுவிய முருங்கைக்கீரை, அரைத்த விழுது, தேவையான அளவு தண்ணீர், மஞ்சள்தூள், உப்பு சேர்த்து மூடி ஆறு விசில்விட்டு இறக்கவும். ஆவி அடங்கியதும் குக்கரின் மூடியைத் திறந்து நன்கு மசித்து வடிகட்டவும். அதனுடன் தேங்காய்ப்பால், மிளகுத்தூள் சேர்த்துச் சூடாக்கி ஒரு கொதிவிட்டு இறக்கிப் பரிமாறவும்.


முருங்கைக்காய் சூப்

தேவை: முருங்கைக்காய் – 4 (சிறிய துண்டுகளாக்கவும்) பெரிய வெங்காயம், தக்காளி – தலா ஒன்று (பொடியாக நறுக்கவும்) சீரகம் – பூண்டு விழுது – ஒரு டீஸ்பூன் (ஒன்றிரண்டாக அரைத்தது) சாம்பார் பொடி – கால் டீஸ்பூன் மஞ்சள்தூள் – 2 சிட்டிகை தேங்காய்ப்பால் (ஒரு மூடியில் எடுத்தது) – ஒரு கப் மிளகுத்தூள், கொத்தமல்லித்தழை – சிறிதளவு தேங்காய் எண்ணெய் – 3 டீஸ்பூன் உப்பு – தேவையான அளவு.

செய்முறை:

முருங்கைக்காயை நன்கு வேகவிட்டு, சதைப்பகுதியை மட்டும் தனியாக எடுத்து நன்றாக மசிக்கவும். வாணலியில் தேங்காய் எண்ணெய் ஊற்றி சீரகம் – பூண்டு விழுது, வெங்காயம், தக்காளி சேர்த்து வதக்கவும். அதனுடன் மஞ்சள்தூள், சாம்பார் பொடி சேர்த்து நன்கு வதக்கவும். பிறகு முருங்கைக்காயின் சதைப்பகுதி, உப்பு சேர்த்து வேகவிடவும். இதனுடன் தேங்காய்ப்பால் சேர்த்து ஒரு கொதிவிட்டு இறக்கவும். மேலே கொத்தமல்லித்தழை, மிளகுத்தூள் சேர்த்துக் கலந்தால் இரும்புச் சத்து நிறைந்த முருங்கைக்காய் சூப் ரெடி.


காலிஃப்ளவர் – புதினா ரைஸ்

தேவை:
ஆய்ந்த காலிஃப்ளவர், சாதம் – தலா ஒரு கப் பெரிய வெங்காயம் – ஒன்று (பொடியாக நறுக்கவும்) பச்சை மிளகாய் – தேவையான அளவு இஞ்சி – பூண்டு விழுது – ஒரு டீஸ்பூன் புதினா – ஒரு கைப்பிடி அளவு எண்ணெய், நெய் – தலா 2 டீஸ்பூன் உப்பு – தேவையான அளவு.
செய்முறை: காலிஃப்ளவரை உப்பு கலந்த வெந்நீரில் போட்டு எடுக்கவும். புதினாவுடன் பச்சை மிளகாய் சேர்த்துத் தண்ணீர் தெளித்து விழுதாக அரைத்தெடுக்கவும். வாணலியில் எண்ணெய், நெய் ஊற்றி வெங்காயம், இஞ்சி – பூண்டு விழுது சேர்த்து வதக்கவும். அதனுடன் அரைத்த புதினா விழுது, உப்பு சேர்த்து நன்கு சுருள வதக்கவும். பிறகு காலிஃப்ளவரைச் சேர்த்து வேகவிட்டு இறக்கவும். இதனுடன் சாதம் சேர்த்து நன்கு புரட்டி எடுத்தால், காலிஃப்ளவர் – புதினா ரைஸ் ரெடி.


முள்ளங்கி – சீரக சாதம்

தேவை:
முள்ளங்கி – ஒன்று (தோல் சீவி, சதுர துண்டுகளாக்கவும்) சாதம் – ஒரு கப் சீரகம் – ஒரு டீஸ்பூன் கறிவேப்பிலை – சிறிதளவு பூண்டு – 5 பல் (வட்டமாக நறுக்கவும்) மிளகுத்தூள், உப்பு – தேவையான அளவு
எண்ணெய், நெய் – தலா ஒரு டீஸ்பூன்.
செய்முறை: முள்ளங்கியுடன் சிறிதளவு தண்ணீர் தெளித்துத் தனியாக வேகவைத்து எடுக்கவும். சாதத்தை உதிர் உதிராக வேகவிட்டு ஆறவைக்கவும். வாணலியில் நெய் – எண்ணெய் ஊற்றி சீரகம், கறிவேப்பிலை தாளிக்கவும். அதனுடன் பூண்டு, முள்ளங்கி, உப்பு சேர்த்துக் கிளறி இறக்கவும். பிறகு சாதம், மிளகுத்தூள் சேர்த்துக் கலந்து பரிமாறவும்.


சிவப்பரிசி ஆப்பம்

தேவை: சிவப்பரிசி, பச்சரிசி – தலா 200 கிராம் உளுத்தம்பருப்பு – ஒரு கைப்பிடி அளவு வெந்தயம் – 2 டீஸ்பூன் தேங்காய் எண்ணெய் உப்பு – தேவையான அளவு.
செய்முறை: சிவப்பரிசி, பச்சரிசி, உளுத்தம்பருப்பு, வெந்தயம் ஆகியவற்றைச் சேர்த்து மூன்று மணி நேரம் ஊறவைக்கவும். பிறகு களைந்து அவற்றுடன் தேவையான அளவு தண்ணீர் சேர்த்து கிரைண்டரில் நைஸாக அரைத்தெடுக்கவும். பிறகு உப்பு சேர்த்துக் கரைத்து ஆறு மணி நேரம் புளிக்கவிடவும். ஆப்பக்கல்லைச் சூடாக்கி மாவை ஆப்பங்களாக ஊற்றி, சிறிதளவு தேங்காய் எண்ணெய்விட்டு வேகவிட்டு எடுக்கவும்.
குறிப்பு: சிவப்பரிசி சேர்ப்பதால் ஆப்ப சோடா தேவையில்லை. நன்கு மிருதுவாக வரும். ருசியாகவும் இருக்கும். சிவப்பரிசியில் சத்துகள் பல அடங்கியுள்ளன.


பசும் மஞ்சள் சூப்

தேவை: பசும் மஞ்சள் – ஒன்றரை இன்ச் அளவு துண்டு ஓமவல்லி இலைகள் – 4 துளசி இலைகள் – 10 சீரகம் – அரை டீஸ்பூன் மிளகு – 4 பூண்டு – 2 பல் தோலுரித்த சின்ன வெங்காயம் – 3 தண்ணீர் – ஒரு லிட்டர் உப்பு – தேவையான அளவு.

செய்முறை:

பசும் மஞ்சளைத் தோல் சீவி, பொடியாக நறுக்கவும். அதனுடன் ஓமவல்லி, துளசி, மிளகு, சீரகம், பூண்டு, வெங்காயம் ஆகியவற்றைச் சேர்த்து மிக்ஸியில் போட்டுச் சிறிதளவு தண்ணீர்விட்டு அரைத்தெடுக்கவும். பாத்திரத்தில் ஒரு லிட்டர் தண்ணீருடன் அரைத்த விழுது சேர்த்துக் கலந்து கொதிக்கவிடவும். தண்ணீர் கொதித்து முக்கால் லிட்டர் ஆன பிறகு இறக்கவும். தேவையானபோது லேசாக சூடாக்கி உப்பு சேர்த்துப் பருகலாம்.
குறிப்பு: இந்த சூப் உடலில் நோய் எதிர்ப்புச் சக்தியை அதிகரிக்கும். தொடர்ந்து எடுத்துக்கொள்ளலாம்.


முளைகட்டிய பயறு கொழுக்கட்டை

தேவை: கொழுக்கட்டை மாவு – 200 கிராம் முளைகட்டிய பச்சைப் பயறு – ஒரு கைப்பிடி அளவு பெரிய வெங்காயம் பச்சை மிளகாய் – தலா 2 (பொடியாக நறுக்கவும்) கடுகு, உளுத்தம்பருப்பு – தலா ஒரு டீஸ்பூன் கடலைப்பருப்பு – 4 டீஸ்பூன் கறிவேப்பிலை, நறுக்கிய கொத்தமல்லித்தழை – சிறிதளவு தேங்காய்த் துருவல் (அ) பல்லு பல்லாகக் கீறிய தேங்காய்த் துண்டுகள் – ஒரு டேபிள்ஸ்பூன் எண்ணெய், உப்பு – தேவையான அளவு.
செய்முறை: வாணலியில் எண்ணெய்விட்டு கடுகு, உளுத்தம்பருப்பு, கடலைப்பருப்பு தாளிக்கவும். வெங்காயம், பச்சை மிளகாய் சேர்த்து வதக்கவும். அதனுடன் முளைகட்டிய பயறு சேர்த்து ஒரு நிமிடம் வதக்கி இறக்கவும். மேலே கொத்தமல்லித்தழை, கறிவேப்பிலை, தேங்காய்த் துருவல் சேர்த்துக் கலக்கவும். கொழுக்கட்டை மாவுடன் வதக்கிய பயறு, உப்பு சேர்த்துக் கலக்கவும். அதனுடன் சிறிதளவு தண்ணீர் தெளித்துப் பிசையவும். பிறகு மாவைக் கொழுக்கட்டைகளாகப் பிடித்து, ஆவியில் வேகவிட்டு எடுக்கவும். சத்தான பயறு கொழுக்கட்டை ரெடி.
குறிப்பு: இடியாப்ப மாவு (அ) சிவப்பரிசி புட்டு மாவிலும் தயாரிக்கலாம்.


சிவப்பரிசிக் கஞ்சி

தேவை: சிவப்பரிசி – 100 கிராம் பாசிப்பருப்பு – ஒரு கைப்பிடி அளவு பெரிய வெங்காயம் பச்சை மிளகாய், தக்காளி – தலா ஒன்று (பொடியாக நறுக்கவும்) இஞ்சி – பூண்டு விழுது – ஒரு டீஸ்பூன் கொத்தமல்லித்தழை – சிறிதளவு வெந்தயம், சீரகம் – தலா அரை டீஸ்பூன் தேங்காய்த் துருவல் – 2 டீஸ்பூன் தேங்காய் எண்ணெய் – 2 டீஸ்பூன் உப்பு – தேவையான அளவு.
செய்முறை: வெறும் வாணலியில் சிவப்பரிசியை லேசாக வறுத்தெடுக்கவும். ஆறிய பிறகு மிக்ஸியில் சன்ன ரவையாக உடைத்தெடுக்கவும். பாசிப்பருப்பை அரை மணி நேரம் ஊறவிடவும். குக்கரில் தேங்காய் எண்ணெய்விட்டு வெந்தயம், சீரகம் தாளிக்கவும். அதனுடன் இஞ்சி – பூண்டு விழுது, பச்சை மிளகாய், வெங்காயம், தக்காளி சேர்த்து வதக்கவும். பிறகு அரை லிட்டர் தண்ணீர் ஊற்றிக் கொதிக்கவிடவும். அதனுடன் அரிசி ரவை, பாசிப்பருப்பு, உப்பு சேர்த்து குக்கரை மூடி ஐந்து விசில்விட்டு இறக்கவும். குக்கரில் ஆவி அடங்கியதும் மூடியைத் திறந்து தேங்காய்த் துருவல், கொத்தமல்லித்தழை சேர்த்துக் கலந்து பரிமாறவும்.
குறிப்பு: விரும்பினால் தேங்காய்ப்பால் சேர்க்கலாம்.


மொசுமொசு அவரைக் கறி

தேவை: மொசுமொசு அவரை – கால் கிலோ (பொடியாக நறுக்கவும்) தோலுரித்த சின்ன வெங்காயம் – ஒரு கைப்பிடி அளவு (வட்டமாக நறுக்கவும்) பூண்டு – 5 பல் (வட்டமாக நறுக்கவும்) சாம்பார் பொடி – தேவையான அளவு மஞ்சள்தூள் – ஒரு சிட்டிகை கடுகு, உளுத்தம்பருப்பு, பெருங்காயத்தூள் – தலா கால் டீஸ்பூன் கறிவேப்பிலை – சிறிதளவு தேங்காய்த் துருவல் – ஒரு டேபிள்ஸ்பூன் எண்ணெய், உப்பு – தேவையான அளவு.
செய்முறை: வாணலியில் எண்ணெய்விட்டு கடுகு, உளுத்தம்பருப்பு, கறிவேப்பிலை, பெருங்காயத்தூள் தாளிக்கவும். அதனுடன் வெங்காயம், பூண்டு சேர்த்து வதக்கவும். பிறகு அவரைக்காய், சாம்பார் பொடி, மஞ்சள்தூள், உப்பு சேர்த்து நன்கு வதக்கவும். அதனுடன் சிறிதளவு தண்ணீர் தெளித்து மூடி போட்டு வேகவிடவும். காய் வெந்ததும் தேங்காய்த் துருவல் சேர்த்துப் புரட்டி இறக்கவும்.
குறிப்பு: மொசுமொசு அவரை மருத்துவக் குணம் கொண்டது. இந்த அவரைக்காய் கிடைக்காதவர்கள் சாதாரண அவரைக்காயிலும் இதேபோல் செய்யலாம்.


முள்ளங்கி பருப்புப் பச்சடி

தேவை: முள்ளங்கி – 2 (தோல் சீவி, சதுர துண்டுகளாக்கவும்) துவரம்பருப்பு – 100 கிராம் தக்காளி, பச்சை மிளகாய் – தலா ஒன்று (பொடியாக நறுக்கவும்) சீரகம் – ஒரு டீஸ்பூன் சாம்பார் பொடி – தேவையான அளவு கறிவேப்பிலை – சிறிதளவு கடுகு, உளுத்தம்பருப்பு – தலா ஒரு டீஸ்பூன் பெருங்காயத்தூள் – 2 சிட்டிகை மஞ்சள்தூள் – சிறிதளவு எண்ணெய் – 3 டீஸ்பூன் உப்பு – தேவையான அளவு.
செய்முறை: குக்கரில் துவரம்பருப்புடன் தேவையான அளவு தண்ணீர் ஊற்றி மூடி, இரண்டு விசில்விட்டு இறக்கவும். வாணலியில் எண்ணெய்விட்டு கடுகு, உளுத்தம்பருப்பு, பெருங்காயத்தூள், கறிவேப்பிலை, சீரகம் தாளிக்கவும். அதனுடன் முள்ளங்கி, தக்காளி, பச்சை மிளகாய் சேர்த்து லேசாக வதக்கவும். பிறகு வேகவைத்த பருப்பு, சாம்பார் பொடி, மஞ்சள்தூள், உப்பு, தேவையான அளவு தண்ணீர் சேர்த்து, அடுப்பை மிதமான தீயில் வைத்து நன்கு வேகவிட்டு இறக்கவும்.

குறிப்பு: இது சாதம், டிபனுக்கு ஏற்ற சைடிஷ்.


பீட்ரூட் ஜூஸ்

தேவை:
பீட்ரூட், நெல்லிக்காய் – தலா ஒன்று தோல் சீவிய இஞ்சி – சிறிய துண்டு (துருவவும்) மிளகுத்தூள், உப்பு – சிறிதளவு.
செய்முறை: பீட்ரூட்டைத் தோல் சீவி, பொடியாக நறுக்கவும். நெல்லிக்காயின் கொட்டையை நீக்கி, பொடியாக நறுக்கவும். பீட்ரூட்டுடன் நெல்லிக்காய் துண்டுகள், இஞ்சித் துருவல், கொஞ்சம் தண்ணீர் சேர்த்து மிக்ஸியில் நைஸாக அரைத்து வடிகட்டவும் (வடிகட்டும்போது சிறிதளவு மட்டும் தண்ணீர் சேர்க்கவும்). அதனுடன் சிறிதளவு உப்பு, மிளகுத்தூள் சேர்த்துப் பருகலாம்.
குறிப்பு: இதை அருந்துவதால் நோய் எதிர்ப்புச் சக்தி அதிகரிக்கும்.


செங்கீரைக் கூட்டு

தேவை:
நறுக்கிய சிவப்பு தண்டுக்கீரை – ஒரு கப் பாசிப்பருப்பு – 100 கிராம் (வேகவைக்கவும்) சீரகம் – ஒரு டீஸ்பூன் பூண்டு – 4 பல் தோலுரித்த சின்ன வெங்காயம் – 10 தக்காளி – ஒன்று (பொடியாக நறுக்கவும்) சாம்பார் பொடி – தேவையான அளவு மஞ்சள்தூள், பெருங்காயத்தூள் – தலா ஒரு சிட்டிகை கடுகு, உளுத்தம்பருப்பு – தலா ஒரு டீஸ்பூன் கறிவேப்பிலை – சிறிதளவு எண்ணெய், உப்பு – தேவையான அளவு.
செய்முறை: பூண்டுடன் சீரகம் சேர்த்து ஒன்றிரண்டாக அரைத்தெடுக்கவும். வாணலியில் எண்ணெய்விட்டு கடுகு, உளுத்தம்பருப்பு, கறிவேப்பிலை, பெருங்காயத்தூள் தாளிக்கவும். அதனுடன் வெங்காயம், தக்காளி, பூண்டு – சீரக விழுது சேர்த்து வதக்கவும். பிறகு, கீரை சேர்த்து நன்கு வதக்கி சாம்பார் பொடி, உப்பு, மஞ்சள்தூள் சேர்த்து, தேவையான அளவு தண்ணீர்விட்டு நன்றாக வேகவிடவும். அதனுடன் வேகவைத்த பாசிப்பருப்பு சேர்த்து ஒரு கொதிவிட்டு இறக்கவும். சத்தான கீரைக் கூட்டு ரெடி.
குறிப்பு: சாதத்துடன் பிசைந்து சாப்பிட ருசியாக இருக்கும். மற்ற கீரைகளிலும் இதேபோல் செய்யலாம்.


குடமிளகாய் சம்பல்

தேவை: குடமிளகாய், பெரிய வெங்காயம் – தலா 2 (சதுர துண்டுகளாக நறுக்கவும்) பூண்டு – 10 பல் (ஒன்றிரண்டாகத் தட்டவும்) சீரகத்தூள் – கால் டீஸ்பூன் மிளகாய்த்தூள் – தேவையான அளவு மஞ்சள்தூள் – 2 சிட்டிகை கொத்தமல்லித்தழை, கறிவேப்பிலை – சிறிதளவு எண்ணெய், உப்பு – தேவையான அளவு.
செய்முறை: வாணலியில் எண்ணெய்விட்டு கறிவேப்பிலை, பூண்டு தாளிக்கவும். அதனுடன் வெங்காயம் சேர்த்து இரண்டு நிமிடங்கள் வதக்கவும். பிறகு குடமிளகாய், சீரகத்தூள், மிளகாய்த்தூள், மஞ்சள்தூள், உப்பு சேர்த்து நன்கு வதக்கி மூடி போட்டு, அடுப்பை சிறு தீயில் வைத்து நன்கு வேகவிடவும். மேலே கொத்தமல்லித்தழை தூவி இறக்கவும்.
குறிப்பு: தக்காளி சேர்த்தும் செய்யலாம். தண்ணீர் தேவையில்லை. நன்கு சுருள வதக்குவதிலேயே வெந்துவிடும்.


பூண்டு – வெங்காய வதக்கல்

தேவை: பூண்டு – 100 கிராம் (தோலுரித்து, வட்டமாக நறுக்கவும்) தோலுரித்த சின்ன வெங்காயம் – 200 கிராம் (நீளவாக்கில் நறுக்கவும்) மஞ்சள்தூள் – ஒரு சிட்டிகை மிளகாய்த்தூள், சீரகத்தூள் – தேவையான அளவு
கடுகு – ஒரு டீஸ்பூன் உளுத்தம்பருப்பு – 2 டீஸ்பூன் கறிவேப்பிலை – சிறிதளவு நல்லெண்ணெய், உப்பு – தேவையான அளவு.
செய்முறை: வாணலியில் எண்ணெய் ஊற்றி கடுகு, உளுத்தம்பருப்பு, கறிவேப்பிலை தாளிக்கவும். அதனுடன் வெங்காயம், பூண்டு சேர்த்து வதக்கவும். பிறகு உப்பு, மஞ்சள்தூள், மிளகாய்த்தூள், சீரகத்தூள் சேர்த்து நன்கு வதக்கி, கலவை சுருண்டு வந்த பிறகு இறக்கவும்.
குறிப்பு: இது தயிர் சாதத்துக்குத் தொட்டுக்கொள்ள ஏற்றது. நோய் எதிர்ப்புச் சக்தியை அதிகரிக்கும்.


ஸ்வீட் பொட்டேட்டோ – நட்ஸ் மில்க் ஷேக்

தேவை: சர்க்கரைவள்ளிக் கிழங்கு – ஒன்று பாதாம், பிஸ்தா, முந்திரி, வால்நட் – தேவையான அளவு காய்ச்சி ஆறவைத்த பால் – 200 மில்லி நாட்டுச் சர்க்கரை – தேவையான அளவு ஏலக்காய்த்தூள் – சிறிதளவு.
செய்முறை: சர்க்கரைவள்ளிக் கிழங்கை வேகவைத்துத் தோல் நீக்கி துருவவும். பாதாம், பிஸ்தா, முந்திரி, வால்நட் ஆகியவற்றை மிக்ஸியில் சேர்த்துப் பொடிக்கவும். அதனுடன் துருவிய சர்க்கரைவள்ளிக் கிழங்கு சேர்த்து அரைத்தெடுக்கவும். அதில் பால், நாட்டுச் சர்க்கரை, ஏலக்காய்த்தூள் சேர்த்து மிக்ஸியில் நுரை பொங்க அடித்துப் பரிமாறவும்.
குறிப்பு: இதைக் குளிரவைத்தும் பரிமாறலாம்.


சிவப்பரிசி கார சேவை

தேவை: சிவப்பரிசி – 250 கிராம் தக்காளி – 6 (பொடியாக நறுக்கவும்) பெரிய வெங்காயம் – 2 (பொடியாக நறுக்கவும்) மிளகாய்த்தூள் – தேவையான அளவு மஞ்சள்தூள் – சிறிதளவு இஞ்சி – பூண்டு விழுது – ஒரு டீஸ்பூன் கொத்தமல்லித்தழை, கறிவேப்பிலை – சிறிதளவு சோம்பு – கால் டீஸ்பூன் எண்ணெய் – ஒரு டேபிள்ஸ்பூன் உப்பு – தேவையான அளவு.
செய்முறை: சிவப்பரிசியை மூன்று மணி நேரம் ஊறவைத்துக் களைந்து கிரைண்டரில் இட்லி மாவு பதத்துக்கு நைஸாக அரைத்தெடுக்கவும். பிறகு மாவை இட்லித் தட்டில் ஊற்றி, ஆவியில் வேகவைத்து எடுக்கவும். இட்லிகள் சூடாக இருக்கும்போதே சேவை அச்சில் போட்டுப் பிழிந்தெடுத்து ஆறவிடவும். வாணலியில் எண்ணெய்விட்டு சோம்பு தாளிக்கவும். அதனுடன் வெங்காயம், கறிவேப்பிலை, இஞ்சி – பூண்டு விழுது, தக்காளி, மஞ்சள் தூள், மிளகாய்த்தூள், உப்பு சேர்த்து நன்கு சுருள வதக்கவும். பிறகு, அடுப்பை சிறு தீயில் வைத்து ஆறிய சேவை சேர்த்து நன்கு புரட்டி, கொத்தமல்லித்தழை தூவி இறக்கவும். மிகவும் சத்தான டிபன் ரெடி.
குறிப்பு: தேங்காய்த் துருவல், நெய், நாட்டுச் சர்க்கரை சேர்த்து இனிப்பு சேவையும் செய்யலாம். இந்த சேவையைச் ‘சந்தவை’ என்றும் சொல்வார்கள்.


பீட்ரூட் தயிர்ப் பச்சடி

தேவை: பீட்ரூட் – 200 கிராம் (தோல் சீவி, சதுர துண்டுகளாக நறுக்கவும்) தயிர் – 200 மில்லி கடுகு, உளுத்தம்பருப்பு – தலா ஒரு டீஸ்பூன் பச்சை மிளகாய் – 2 (பொடியாக நறுக்கவும்) கொத்தமல்லித்தழை – சிறிதளவு எண்ணெய், உப்பு – தேவையான அளவு.
செய்முறை: பீட்ரூட் துண்டுகளுடன் சிறிதளவு தண்ணீர், சிறிதளவு உப்பு சேர்த்து நன்கு வேகவைத்து எடுக்கவும். ஆறியதும் அதனுடன் தயிர், சிறிதளவு உப்பு சேர்த்துக் கலக்கவும். வாணலியில் எண்ணெய்விட்டு கடுகு, உளுத்தம்பருப்பு தாளிக்கவும். அதனுடன் பச்சை மிளகாய் சேர்த்து வதக்கி, தயிர்க்கலவையுடன் சேர்க்கவும். மேலே கொத்தமல்லித்தழை தூவிப் பரிமாறவும்.


தானிய தோசை

தேவை: ராகி, கம்பு, கோதுமை, வரகு – தலா 100 கிராம் கொள்ளு – 50 கிராம் கறுப்பு கொண்டைக்கடலை – ஒரு கைப்பிடி அளவு கறுப்பு உளுந்து – 100 கிராம் வெந்தயம் – ஒரு டீஸ்பூன் எண்ணெய், உப்பு – தேவையான அளவு.

செய்முறை:

கறுப்பு கொண்டைக்கடலையை முதல் நாள் இரவே ஊறவைக்கவும். ராகி, கம்பு, கோதுமை, வரகு, கொள்ளு, உளுத்தம்பருப்பு, வெந்தயம் ஆகியவற்றை ஒன்றாகச் சேர்த்து நான்கு மணி நேரம் ஊறவைக்கவும். பிறகு அதனுடன் கொண்டைக்கடலை சேர்த்துக் களைந்து தோசை மாவுப் பதத்துக்கு அரைத்தெடுக்கவும். உப்பு சேர்த்துக் கரைத்து மூன்று மணி நேரம் புளிக்கவிடவும். தோசைக்கல்லைக் காயவைத்து, மாவைத் தோசைகளாக ஊற்றி, சுற்றிலும் எண்ணெய்விட்டு இருபுறமும் வேகவைத்து எடுக்கவும்.
குறிப்பு: மாவைச் சிறிய ஊத்தப்பமாக ஊற்றி, மேலே வெங்காயம் தூவி சுட்டெடுக்கலாம்.


கொத்தமல்லி – புதினாத் தொக்கு

தேவை:
கொத்தமல்லித்தழை, புதினா, கறிவேப்பிலை, பச்சைப் பட்டாணி – தலா 2 கைப்பிடி அளவு குடமிளகாய் – ஒன்று (பொடியாக நறுக்கவும்) பச்சை மிளகாய் – தேவையான அளவு பெருங்காயத்தூள் – 2 சிட்டிகை கடுகு – ஒரு டீஸ்பூன் புளி – சிறிதளவு நல்லெண்ணெய், உப்பு – தேவையான அளவு.

செய்முறை:

கொத்தமல்லித்தழையுடன் புதினா, கறிவேப்பிலை, குடமிளகாய், பச்சைப் பட்டாணி, பச்சை மிளகாய், புளி, சிறிதளவு தண்ணீர் சேர்த்து மிக்ஸியில் விழுதாக அரைத்தெடுக்கவும். வாணலியில் எண்ணெய் ஊற்றி கடுகு, பெருங்காயத்தூள் தாளிக்கவும். அதனுடன் அரைத்த விழுது, உப்பு சேர்த்து நன்கு சுருள வதக்கி இறக்கவும். இதை சாதத்துடன் சாப்பிடலாம். இட்லி, தோசைக்குத் தொட்டுக்கொள்ளலாம்.
குறிப்பு: புளிக்குப் பதிலாக எலுமிச்சைச் சாறு சேர்க்கலாம்.


சிவப்பு அவல் – நட்ஸ் மசாலா

தேவை:
சுத்தம் செய்த சிவப்பு அவல் – ஒரு கப் கொத்தமல்லித்தழை – சிறிதளவு இஞ்சி – பூண்டு விழுது – ஒரு டீஸ்பூன் மஞ்சள்தூள், மிளகாய்த்தூள் – சிறிதளவு உப்பு – தேவையான அளவு.
தாளிக்க: பெரிய வெங்காயம் – 2 (பொடியாக நறுக்கவும்) தக்காளி, பச்சை மிளகாய் – தலா ஒன்று (பொடியாக நறுக்கவும்) பொடியாக நறுக்கிய வால்நட், பாதாம், பிஸ்தா, முந்திரி – தலா ஒரு டீஸ்பூன் கடுகு, உளுத்தம்பருப்பு, கடலைப்பருப்பு – தலா ஒரு டீஸ்பூன் கறிவேப்பிலை – சிறிதளவு நெய் – ஒரு டீஸ்பூன் எண்ணெய் – ஒரு டேபிள்ஸ்பூன்.
செய்முறை: வாணலியில் நெய்விட்டு வால்நட், பாதாம், பிஸ்தா, முந்திரி ஆகியவற்றைச் சேர்த்து வறுத்துத் தனியாக எடுத்து வைக்கவும். அதே வாணலியில் எண்ணெய்விட்டு கடுகு, உளுத்தம்பருப்பு, கடலைப்பருப்பு, கறிவேப்பிலை தாளிக்கவும். அதனுடன் வெங்காயம், தக்காளி, பச்சை மிளகாய் சேர்த்து வதக்கவும். பிறகு இஞ்சி – பூண்டு விழுது, மஞ்சள்தூள், மிளகாய்த்தூள், உப்பு சேர்த்து நன்கு வதக்கவும். அதனுடன் ஒன்றரை கப் தண்ணீர் ஊற்றிக் கொதிக்கவிடவும். பிறகு அவல் சேர்த்து இரண்டு நிமிடங்கள் கழித்து, அடுப்பை சிறு தீயில் வைத்து மூடி போட்டு வேகவிடவும். மேலே கொத்தமல்லித்தழை, வறுத்த நட்ஸ் சேர்த்துக் கலந்து இறக்கிப் பரிமாறவும்.


வரகு – கொள்ளு பொங்கல்

தேவை: வரகு அரிசி – 200 கிராம் கொள்ளு – 50 கிராம் சீரகம் – 2 டீஸ்பூன் மிளகு – 15 நெய் – 3 டீஸ்பூன் தேங்காய் எண்ணெய் – 3 டீஸ்பூன் தோல் சீவிய இஞ்சி – சிறிய துண்டு பச்சை மிளகாய் – ஒன்று கொத்தமல்லித்தழை – சிறிதளவு கறிவேப்பிலை – ஒரு கைப்பிடி அளவு உப்பு – தேவையான அளவு.
செய்முறை: கொள்ளுப் பயறை இரண்டு மணி நேரம் ஊறவைக்கவும். வரகரிசியை அரை மணி நேரம் ஊறவைக்கவும். இஞ்சியுடன் பச்சை மிளகாய் சேர்த்து ஒன்றிரண்டாக அரைத்தெடுக்கவும். கறிவேப்பிலையுடன் சிறிதளவு தண்ணீர்விட்டு விழுதாக அரைத்தெடுக்கவும். குக்கரில் நெய், எண்ணெய் ஊற்றி சீரகம், மிளகு தாளித்து, கறிவேப்பிலை விழுது சேர்த்துக் கிளறவும். அதனுடன் இஞ்சி – பச்சை மிளகாய் விழுது, கொத்தமல்லித்தழை சேர்த்து நன்கு வதக்கவும். பிறகு உப்பு, தேவையான அளவு தண்ணீர் சேர்த்துக் கொதிக்கவிடவும். அதனுடன் கொள்ளு, வரகு சேர்த்து குக்கரை மூடி ஆறு விசில்விட்டு இறக்கவும். குக்கரில் ஆவி அடங்கியதும் மூடியைத் திறந்து கொத்தமல்லித்தழை தூவிப் பரிமாறவும்.

குறிப்பு: விரும்பினால் முந்திரி சேர்க்கலாம். சாதாரண அரிசியைவிட சிறுதானி யங்கள் இறுகும் தன்மையுடையதால் தண்ணீர் அதிகமாகச் சேர்க்கவும்.


ராகி – பருப்பு அடை

தேவை: ராகி (கேழ்வரகு) – 100 கிராம் துவரம்பருப்பு, கடலைப்பருப்பு – தலா 50 கிராம் சோம்பு – ஒரு டீஸ்பூன் பூண்டு – 4 பல் காய்ந்த மிளகாய், எண்ணெய், உப்பு – தேவையான அளவு.
தாளிக்க: பெரிய வெங்காயம் – ஒன்று (பொடியாக நறுக்கவும்) கடுகு – ஒரு டீஸ்பூன் உளுத்தம்பருப்பு, கடலைப்பருப்பு – தலா 2 டீஸ்பூன் கறிவேப்பிலை – சிறிதளவு எண்ணெய் – சிறிதளவு முருங்கை இலை – சிறிதளவு. மேலே தூவ: வறுத்து ஒன்றிரண்டாகப் பொடித்த வேர்க்கடலை, கொத்தமல்லித்தழை – சிறிதளவு

செய்முறை:

ராகி, துவரம்பருப்பு, கடலைப்பருப்பு ஆகியவற்றை ஒன்றாகச் சேர்த்து மூன்று மணி நேரம் ஊறவைக்கவும். அதனுடன் சோம்பு, பூண்டு, காய்ந்த மிளகாய், உப்பு சேர்த்துக் கெட்டியாக அரைத்தெடுக்கவும். வாணலியில் எண்ணெய் ஊற்றித் தாளிக்கக்கொடுத்துள்ள பொருள்களைச் சேர்த்துத் தாளித்து மாவுடன் சேர்த்துக் கலக்கவும். தோசைக்கல்லைக் காயவைத்து மாவை அடைகளாக ஊற்றி, சுற்றிலும் எண்ணெய்விட்டு இருபுறமும் வேகவிடவும். மேலே வேர்க்கடலைப் பொடி, கொத்தமல்லித்தழை தூவி எடுத்துப் பரிமாறவும்.


மிக்ஸட் வெஜ் புர்ஜி

தேவை: நறுக்கிய காய்கறி கலவை (கேரட், பீன்ஸ், கோஸ், பச்சைப் பட்டாணி, குடமிளகாய், காலிஃப்ளவர்) – ஒரு கப் பூண்டு – 10 பல் (பொடியாக நறுக்கவும்) தோல் சீவிய இஞ்சி – சிறிய துண்டு (பொடியாக நறுக்கவும்)
கரம் மசாலாத்தூள் – சிறிதளவு பெரிய வெங்காயம், தக்காளி – தலா 2 (பொடியாக நறுக்கவும்) மிளகாய்த்தூள் – தேவையான அளவு தனியாத்தூள் (மல்லித்தூள்) – ஒரு டீஸ்பூன் மஞ்சள்தூள் – ஒரு சிட்டிகை கறிவேப்பிலை, கொத்தமல்லித்தழை – சிறிதளவு எண்ணெய் – ஒரு டேபிள்ஸ்பூன் உப்பு – தேவையான அளவு.
செய்முறை: காலிஃப்ளவரை உப்பு கலந்த வெந்நீரில் போட்டு எடுக்கவும். வாணலியில் எண்ணெய்விட்டு, கறிவேப்பிலை தாளிக்கவும். அதனுடன் வெங்காயம், இஞ்சி, பூண்டு, தக்காளி சேர்த்து வதக்கவும். பிறகு காய்கறிகள், மல்லித்தூள், மிளகாய்த்தூள், மஞ்சள்தூள், கரம் மசாலாத்தூள், உப்பு சேர்த்து நன்கு வதக்கி, சிறிதளவு தண்ணீர் தெளித்து மூடி போட்டு வேகவிடவும். மேலே கொத்தமல்லித்தழை தூவி இறக்கவும்.


தினை – கேரட் ரைஸ்

தேவை: தினை – 200 கிராம் கேரட் – 4 (துருவவும்) பொடியாக நறுக்கிய பெரிய வெங்காயம் – ஒரு கப் பூண்டு – 6 பல் (பொடியாக நறுக்கவும்) பொடியாக நறுக்கிய பச்சை மிளகாய் – தேவையான அளவு கடுகு, உளுத்தம்பருப்பு, கடலைப்பருப்பு – தலா ஒரு டீஸ்பூன் தேங்காய்த் துருவல் – ஒரு டேபிள்ஸ்பூன் கொத்தமல்லித்தழை, கறிவேப்பிலை – சிறிதளவு எண்ணெய் – ஒரு டேபிள்ஸ்பூன் உப்பு – தேவையான அளவு.
செய்முறை: தினையை நன்கு களைந்து ஒரு பங்குக்கு இரண்டரை பங்கு தண்ணீர்விட்டு குக்கரில் சேர்த்து மூன்று விசில்விட்டு இறக்கி ஆறவிடவும். பிறகு வாணலியை அடுப்பில் ஏற்றி எண்ணெய்விட்டு கடுகு, உளுத்தம்பருப்பு, கடலைப்பருப்பு, கறிவேப்பிலை தாளித்து வெங்காயம், பச்சை மிளகாய், பூண்டு சேர்த்து நன்கு வதக்கவும். இதனுடன் கேரட் துருவல் சேர்த்துக் கலந்து, ஒரு நிமிடத்துக்குப் பிறகு ஆறிய தினை சாதம், உப்பு, தேங்காய்த் துருவல் சேர்த்து உடையாமல் புரட்டி, நன்கு சூடேறியதும் கொத்தமல்லித்தழை தூவி இறக்கிப் பரிமாறவும்.


காராமணி – தேங்காய் – மாங்காய் சுண்டல்

தேவை: காராமணி – 200 கிராம் தேங்காய் – ஒரு டேபிள்ஸ்பூன் (பொடியாக நறுக்கியது) மாங்காய் – 2 டேபிள்ஸ்பூன் (பொடியாக நறுக்கியது) சீரகத்தூள் – கால் டீஸ்பூன் இஞ்சித் துருவல் – சிறிதளவு பெரிய வெங்காயம் – ஒன்று பச்சை மிளகாய் – 2 (பொடியாக நறுக்கவும்) மிளகுத்தூள் – சிறிதளவு, கொத்தமல்லித்தழை, பெருங்காயத்தூள் – சிறிதளவு எண்ணெய், உப்பு – தேவையான அளவு. தாளிக்க: கடுகு, உளுத்தம்பருப்பு – தலா ஒரு டீஸ்பூன் கறிவேப்பிலை – சிறிதளவு.
செய்முறை: காராமணியை ஒரு மணி நேரம் ஊறவைத்துச் சிறிதளவு உப்பு சேர்த்து குக்கரில் வேகவிட்டு எடுத்து வைக்கவும். பிறகு வாணலியில் எண்ணெய்விட்டுத் தாளிக்கக் கொடுத்துள்ளவற்றைத் தாளித்து, வெங்காயம், பச்சை மிளகாய் சேர்த்து நன்கு வதக்கவும். இதனுடன் இஞ்சித் துருவல் சேர்த்துக் கிளறி, காராமணி, சீரகத்தூள், பெருங்காயத்தூள் சேர்த்து நன்கு புரட்டி உப்பு, மிளகுத்தூள் சேர்த்துக் கலக்கவும். பிறகு, ஐந்து நிமிடங்கள் அடுப்பை சிம்மில் வைத்து, இறுதியாக தேங்காய், மாங்காய் துண்டுகளைப் போட்டு நன்கு புரட்டி, கொத்தமல்லித்தழை தூவி இறக்கவும்.


முப்பருப்புப் பாயசம்

தேவை: பாசிப்பருப்பு – 100 கிராம் கடலைப்பருப்பு – 50 கிராம் துவரம்பருப்பு – 50 கிராம் வெல்லம் – 200 கிராம் தேங்காய்த் துருவல் – 4 டேபிள்ஸ்பூன் ஏலக்காய் – 3 முந்திரி, திராட்சை – தேவையான அளவு நெய் – 2 டீஸ்பூன் பச்சரிசி – ஒரு டேபிள்ஸ்பூன்.

செய்முறை:

பச்சரிசியை அரை மணி நேரம் ஊறவைத்து ஏலக்காய் சேர்த்து நைஸாக அரைத்து, தேங்காய்த் துருவலை இறுதியாகச் சேர்த்து ஒன்றிரண்டாக அரைத்து வைக்கவும். பருப்பு வகைகளை அரை மணி நேரம் ஊறவைத்து தேவையான தண்ணீர்விட்டு குக்கரில் சேர்த்து வேகவைத்து எடுத்து வைக்கவும். வெல்லத்தைப் பொடித்துச் சிறிதளவு தண்ணீர் சேர்த்துக் கொதிக்கவைத்து வடிகட்டி வைக்கவும். பிறகு வேகவைத்த பருப்புக் கலவையை அடுப்பில் ஏற்றி தேங்காய் – அரிசிக் கலவை மற்றும் வெல்லக் கரைசல் சேர்த்து நன்கு கரண்டியால் கலக்கி ஐந்து நிமிடங்கள் கொதிக்கவிட்டு, இறுதியாக நெய்யில் வறுத்த முந்திரி, திராட்சை சேர்த்து இறக்கவும். விருப்பப்பட்டால் சிறிதளவு பால் சேர்க்கலாம்.


பச்சைப் பயறு – கொத்தமல்லி பெசரட்

தேவை:
பச்சைப் பயறு – 100 கிராம் பச்சரிசி – ஒரு கைப்பிடி அளவு கொத்தமல்லித்தழை – தேவையான அளவு சீரகம் – 2 சிட்டிகை பச்சை மிளகாய் – ஒன்று எண்ணெய், உப்பு – தேவையான அளவு.
செய்முறை: பச்சைப் பயறு, பச்சரிசி இரண்டையும் இரண்டு மணி நேரம் ஊறவைத்து, கொத்தமல்லித்தழை, பச்சை மிளகாய், உப்பு, சீரகம் சேர்த்து மிக்ஸியில் சற்று கொரகொரப்பாக அரைத்து, தோசை மாவைக் காட்டிலும் சிறிது தண்ணீர் அதிகம் சேர்த்துக் கரைக்கவும். தோசைக்கல்லை அடுப்பில் ஏற்றி மாவைத் தோசைகளாக ஊற்றி, சுற்றிலும் எண்ணெய்விட்டு இரண்டு பக்கமும் சிவந்ததும் எடுக்கவும்.


வேர்க்கடலை – அவல் உப்புமா

தேவை: கெட்டி அவல் – 200 கிராம் பெரிய வெங்காயம் – 2 (நறுக்கியது) வேர்க்கடலை – ஒரு கைப்பிடி அளவு (வேகவைக்கவும்) பச்சை மிளகாய் – 2 சீரகத்தூள் – 2 சிட்டிகை தேங்காய்த் துருவல் – ஒரு டேபிள்ஸ்பூன் கடுகு, உளுத்தம்பருப்பு, கறிவேப்பிலை, கொத்தமல்லித்தழை – சிறிதளவு கடலைப்பருப்பு – 2 டீஸ்பூன் மஞ்சள்தூள் – சிறிதளவு எலுமிச்சைச் சாறு – ஒரு டீஸ்பூன் எண்ணெய் – ஒரு டேபிள்ஸ்பூன் உப்பு – தேவையான அளவு.
செய்முறை: வேர்க்கடலையை 12 மணி நேரம் ஊறவைத்து வேகவைக்கவும். அவலை நன்கு அலசி தண்ணீரை வடியவிடவும். பிறகு வாணலியை அடுப்பில் ஏற்றி எண்ணெய் ஊற்றி கடுகு, கடலைப்பருப்பு, உளுத்தம்பருப்பு, கறிவேப்பிலை தாளித்து வெங்காயம், பச்சை மிளகாய் சேர்த்து நன்கு வதக்கவும். இதனுடன் அவலைச் சேர்த்து மஞ்சள்தூள், சீரகத்தூள், உப்பு சேர்த்து நன்கு புரட்டி, லேசாக தண்ணீர் தெளித்து, அடுப்பை மிதமான தீயில் வைத்து, மூடி போட்டு ஐந்து நிமிடங்கள் வேகவிடவும். பிறகு வேகவைத்த வேர்க்கடலை, எலுமிச்சைச் சாறு சேர்த்து, கொத்தமல்லித்தழை தூவி, தேங்காய்த் துருவலையும் சேர்த்து நன்கு புரட்டி இறக்கிப் பரிமாறவும்.

Posted in படித்ததில் பிடித்தது | Leave a comment

30 வகை ரசம்

கொட்டு ரசம்

தேவையானவை: புளித் தண்ணீர் – 2 கப், ரசப்பொடி – 2 டீஸ்பூன், பெருங்காயத்தூள் – அரை டீஸ்பூன்,  கடுகு, கொத்தமல்லி, கறிவேப்பிலை, எண்ணெய்,  உப்பு – தேவையான அளவு.

 

ரசப்பொடி செய்ய – தேவையானவை: தனியா – 300 கிராம், மிளகு – 100 கிராம், துவரம்பருப்பு – 100 கிராம், கடலைப்பருப்பு – 50 கிராம், சீரகம் – 25 கிராம், மஞ்சள்துண்டு – சிறியது, காய்ந்த மிளகாய் – 20-லிருந்து 30 அல்லது காரத்துக்கு ஏற்றப்படி (கொடுக்கப்பட்டுள்ள பொருட்களை மெஷினிலோ அல்லது மிக்ஸியிலோ கரகரப்பாக அரைத்து வைத்துக் கொண்டு தேவைக்கு ஏற்ப பயன்படுத்தலாம்).

செய்முறை: புளித் தண்ணீரை கொதிக்கவிடவும். புளி வாசனை போனவுடன் உப்பு, ரசப்பொடி, பெருங்காயத்தூள் சேர்த்து ஒரு பொங்கு பொங்கியவுடன் கீழே இறக்கி… கறிவேப்பிலை, கொத்தமல்லி சேர்க்கவும். எண்ணெயில் கடுகு தாளித்துச் சேர்க்கவும்.

முருங்கைப் பிஞ்சு ரசம்

தேவையானவை: முருங்கைப் பிஞ்சு (நறுக்கியது) – ஒரு கப், துவரம்பருப்பு – கால் கப், தக்காளி – 2, மிளகு – சீரகத்தூள் – 2 டீஸ்பூன், மஞ்சள்தூள் – அரை டீஸ்பூன், கடுகு – ஒரு டீஸ்பூன், பெருங்காயத்தூள் – அரை டீஸ்பூன், கொத்தமல்லி, கறிவேப்பிலை – சிறிதளவு, எலுமிச்சைச் சாறு – 3 டீஸ்பூன், எண்ணெய் – ஒரு டீஸ்பூன், உப்பு – தேவையான அளவு.

செய்முறை: துவரம்பருப்பு, தக்காளி, முருங்கைப் பிஞ்சு ஆகியவற்றுடன் மஞ்சள்தூள் சேர்த்து வேக வைத்துக் கொள்ளவும். இதில் தேவையான தண்ணீர் சேர்த்து, அடுப்பில் வைத்து, உப்பு, மிளகு – சீரகத்தூள் சேர்க்கவும். அடுப்பை மிதமான தீயில் எரிய விடவும். ஒரு கொதி வந்ததும் கீழே இறக்கி, எலுமிச்சைச் சாறு சேர்க்கவும். எண்ணெயில் கடுகு, பெருங்காயத்தூள் தாளித்துச் சேர்க்கவும். கொத்தமல்லி, கறிவேப்பிலை தூவி அலங்கரிக்கவும்.

வெங்காய ரசம்

தேவையானவை: தனியா – 4 டீஸ்பூன், காய்ந்த மிளகாய் – 6, தேங்காய் துருவல் – 2 டீஸ்பூன், இஞ்சித் துருவல் – ஒரு டீஸ்பூன், பூண்டு – 4 பல், தக்காளி – 2, நறுக்கிய வெங்காயம் – கால் கப், புளித் தண்ணீர் – 2 கப், கறிவேப்பிலை – சிறிதளவு, கடுகு, எண்ணெய், உப்பு – தேவையான அளவு.

செய்முறை: தனியா, காய்ந்த மிளகாய், தேங்காய் துருவல், இஞ்சித் துருவல், பூண்டு, தக்காளி, வெங்காயம் ஆகியவற்றை சிறிது நேரம் வதக்கி விழுதாக அரைக்கவும். இந்த விழுதுடன் புளித் தண்ணீர், உப்பு சேர்த்துக் கொதிக்கவிடவும் (தேவைப்பட்டால் இன்னும் சிறிதளவு தண்ணீர் சேர்க்கலாம்). எண்ணெயில் கடுகு தாளித்துச் சேர்த்து இறக்கவும். கறிவேப்பிலை தூவவும் .

கொத்தமல்லி ரசம்

தேவையானவை: தக்காளி – 3, தனியா – 2 டீஸ்பூன், மிளகு – அரை டீஸ்பூன், சீரகம் – ஒரு டீஸ்பூன், காய்ந்த மிளகாய் – 4, கொத்தமல்லி – ஒரு சிறிய கட்டு, கடுகு, எண்ணெய், உப்பு – தேவையான அளவு.

செய்முறை: தக்காளி, கொத்தமல்லியுடன் தனியா, மிளகு, சீரகம், காய்ந்த மிளகாய் சேர்த்து அரைத்துக் கொள்ளவும். இதைத் தேவையான தண்ணீர், உப்பு சேர்த்து கொதிக்கவிட்டு இறக்கவும். எண்ணெயில் கடுகு தாளித்துச் சேர்க்கவும். பெருங்காயம் தேவை இல்லை.

 

கறிவேப்பிலை ரசம்

தேவையானவை: கறிவேப்பிலை – ஒரு கப், துவரம்பருப்பு – 3 டீஸ்பூன், மிளகு, சீரகம் – தலா ஒரு டீஸ்பூன், புளி – ஒரு சிறிய உருண்டை,

மஞ்சள்தூள் – அரை டீஸ்பூன், நெய் – சிறிதளவு, கடுகு, உப்பு – தேவையான அளவு.

செய்முறை: கறிவேப்பிலை, துவரம்பருப்பு, மிளகு, சீரகம் ஆகியவற்றை விழுதாக அரைத்துக் கொள்ளவும். புளியில் இரண்டு கப் தண்ணீர் விட்டுக் கரைத்து வடிகட்டிக் கொள்ளவும். இதை அடுப்பில் வைத்து மஞ்சள்தூள் சேர்த்து சிறிது நேரம் கொதிக்கவிடவும். இதனுடன் உப்பு மற்றும் அரைத்த விழுதை சேர்த்து, மேலும் ஓரிரண்டு நிமிடம் கொதிக்கவிடவும். நெய்யில் கடுகு தாளித்துச் சேர்த்து இறக்கவும்.

பொரித்த ரசம் – 1

தேவையானவை: வேக வைத்து கரைத்த துவரம்பருப்பு தண்ணீர் – 2 கப், தக்காளி – 2, எலுமிச்சைச் சாறு – 2 டீஸ்பூன், பெருங்காயத்தூள் – அரை டீஸ்பூன், நெய் – 3 டீஸ்பூன், கடுகு – ஒரு டீஸ்பூன், கறிவேப்பிலை, கொத்தமல்லி – சிறிதளவு, உப்பு – தேவையான அளவு.

அரைக்க: துவரம்பருப்பு, தனியா – தலா 2 டீஸ்பூன், காய்ந்த மிளகாய் – 3, மிளகு – ஒரு டீஸ்பூன் (சிறிது நெய்யில் வறுக்கவும்), சீரகம் – ஒரு டீஸ்பூன் (வறுக்க வேண்டாம்).

செய்முறை: பருப்புத் தண்ணீர், தக்காளி துண்டுகள் சேர்த்து தக்காளி வேகும் வரை கொதிக்க விடவும். (அல்லது பருப்பு, தக்காளி துண்டுகளை ஒன்றாக வேக வைத்து மசிக்கவும்). இதில் தேவையான அளவு அரைத்த பொடி, பெருங்காயத்தூள், உப்பு சேர்த்து, பொங்க வைத்து,  கீழே இறக்கி, எலுமிச்சைச் சாறு சேர்க்கவும். நெய்யில் கடுகு தாளித்துச் சேர்த்து… கொத்தமல்லி, கறிவேப்பிலை கிள்ளிப் போடவும்.

பொரித்த ரசம் – 2

தேவையானவை: வேக வைத்து கரைத்த துவரம்பருப்புத் தண்ணீர் – 2 கப், காய்ந்த மிளகாய் – 3, உளுத்தம்பருப்பு – 2 டீஸ்பூன், மிளகு – ஒரு டீஸ்பூன், தனியா – 2 டீஸ்பூன், சீரகம் – ஒரு டீஸ்பூன், கடுகு – ஒரு டீஸ்பூன், தக்காளி சாறு – ஒரு கப், கொத்தமல்லி, கறிவேப்பிலை – சிறிதளவு, நெய் – 2 டீஸ்பூன், உப்பு – தேவையான அளவு.

செய்முறை: தனியா, உளுத்தம்பருப்பு, மிளகு, காய்ந்த மிளகாய் ஆகியவற்றை நெய்யில் வறுத்து, சீரகம் சேர்த்து மிக்ஸியில் விழுதாக அரைத்துக் கொள்ளவும். இந்த விழுதுடன் பருப்புத் தண்ணீர், தக்காளி சாறு, உப்பு கலந்து 2 நிமிடம் கொதிக்கவிடவும். நெய்யில் கடுகு தாளித்துச் சேர்த்து…. கொத்தமல்லி, கறிவேப்பிலை கிள்ளிப் போட்டு இறக்கவும்.

திப்பிலி ரசம்

தேவையானவை: கண்ட திப்பிலி – 10 கிராம், மிளகு, சீரகம் – தலா ஒரு டீஸ்பூன், காய்ந்த மிளகாய் – 3, கடுகு –  ஒரு டீஸ்பூன், புளி – எலுமிச்சம் பழ அளவு, எண்ணெய், உப்பு – தேவையானஅளவு.

செய்முறை: வாணலியில் ஒரு டீஸ்பூன் எண்ணெய் விட்டு திப்பிலியை வறுக்கவும். கீழே இறக்கி சிறிதளவு தண்ணீர் விட்டு 10 நிமிடம் ஊற வைக்கவும் காய்ந்த மிளகாய், புளி, மிளகு, சீரகம் ஆகியவற்றை இதில் சேர்த்து தண்ணீர் விட்டு விழுதாக அரைத்துக் கொள்ளவும். பிறகு, இதை ஒரு பாத்திரத்தில் போட்டு தேவையான அளவு தண்ணீர் விட்டு, உப்பு சேர்த்துக் கரைத்து 2 நிமிடம் கொதிக்கவிடவும். கீழே இறக்கி, கடுகு தாளிக்கவும் .

ஒப்பட்டு ரசம்

தேவையானவை: வேக வைத்த கடலைப்பருப்பு – அரை கப், தேங்காய் துருவல் – 2 டீஸ்பூன், பொடித்த வெல்லம் – 3 டேபிள்ஸ்பூன், புளித் தண்ணீர் – 2 கப், ரசப்பொடி – 2 டீஸ்பூன், பெருங்காயத்தூள் – அரை டீஸ்பூன், மஞ்சள்தூள் – கால் டீஸ்பூன், கொத்தமல்லி, கறிவேப்பிலை – சிறிதளவு, கடுகு, எண்ணெய், உப்பு –  தேவையான அளவு.

செய்முறை: வேக வைத்த கடலைப்பருப்பு, வெல்லம், தேங்காய் துருவலை சேர்த்து கெட்டியாக அரைத்து, வாணலியிலில் சேர்த்து கிளறிக் கொள்ளவும். புளித் தண்ணீரில் மஞ்சள்தூள் சேர்த்துக் கொதிக்க விடவும். பெருங்காயத்தூள், ரசப்பொடி, உப்பு சேர்த்து மேலும் 5 நிமிடம் கொதிக்க விட்டு, பருப்புக் கலவையை சிறு சிறு உருண்டைகளாக உருட்டிப் போட்டு, ஒரு நிமிடம் கொதிக்கவிட்டு, கீழே இறக்கவும். எண்ணெயில் கடுகு தாளித்துச் சேர்க்கவும். கடைசியில் கொத்தமல்லி, கறிவேப்பிலை தூவவும்.

ஆப்பிள் ரசம்

தேவையானவை: பொடியாக நறுக்கிய ஆப்பிள் – ஒரு கப், வேக வைத்த துவரம்பருப்பு (நன்றாக மசித்துக் கொள்ளவும்) – அரை கப், தக்காளி துண்டுகள் – கால் கப், கடுகு, சீரகம் – தலா அரை டீஸ்பூன், மஞ்சள்தூள் – அரை டீஸ்பூன்,  கொத்தமல்லி, கறிவேப்பிலை – சிறிதளவு, எண்ணெய், உப்பு – தேவையான அளவு.

வறுத்து அரைக்க: துவரம்பருப்பு – இரண்டு டீஸ்பூன், மிளகு – ஒரு டீஸ்பூன், தனியா – 4 டீஸ்பூன், காய்ந்த மிளகாய் – 2.

செய்முறை: வறுத்து அரைக்கக் கொடுத்துள் ளவற்றை விழுதாக அரைத்துக் கொள்ளவும். ஆப்பிள் துண்டுகளை 3 கப் தண்ணீர் விட்டு வேகவிடவும் (குழைய வேகவிட வேண்டாம்). பிறகு, இதில் தக்காளி துண்டுகள், மசித்த பருப்பு, வறுத்து அரைத்த விழுது,

மஞ்சள்தூள் உப்பு சேர்த்து, இரண்டு கொதி விட்டு இறக்கவும். எண்ணெ யில் கடுகு, சீரகம் தாளித்துச் சேர்க்கவும். கொத்தமல்லி, கறிவேப் பிலை கிள்ளிப் போடவும்.

துவரம்பருப்பு ரசம்

தேவையானவை: வேக வைத்து கரைத்த துவரம்பருப்பு தண்ணீர் – 2 கப், தக்காளி சாறு – அரை கப், மஞ்சள்தூள் – அரை டீஸ்பூன், துவரம்பருப்பு – மிளகு – மிளகாய் அரைத்த பொடி – 2 டீஸ்பூன், கடுகு – ஒரு டீஸ்பூன், பெருங்காயத்தூள் – அரை டீஸ்பூன், நெய் – 2 டீஸ்பூன், கறிவேப்பிலை, கொத்தமல்லி – சிறிதளவு, உப்பு – தேவையான அளவு.

செய்முறை: பருப்புத் தண்ணீர், தக்காளி சாறு, அரைத்த பொடி, உப்பு பெருங்காயத்தூள், மஞ்சள்தூள் சேர்த்து பொங்கி வரும்வரை கொதிக்கவிட்டு, கீழே இறக்கவும். நெய்யில் கடுகு தாளித்துச் சேர்த்து, கொத்தமல்லி, கறிவேப்பிலை தூவவும்.

கிள்ளு மிளகாய் ரசம்

தேவையானவை: காய்ந்த மிளகாய் – 2, கடுகு – ஒரு டீஸ்பூன், பெருங்காயத்தூள் – அரை டீஸ்பூன், புளித் தண்ணீர் – 2 கப், கறிவேப்பிலை, கடுகு, எண்ணெய், உப்பு – தேவையானஅளவு.

செய்முறை: புளித் தண்ணீரை 5 நிமிடம் கொதிக்கவிட்டு… உப்பு, பெருங்காயத்தூள் சேர்க்கவும். கடுகு மற்றும் இரண்டாக கிள்ளிய மிளகாயை எண்ணெயில் தாளித்துச் சேர்த்து, ஒரு கொதி வந்தவுடன் இறக்கவும். கடைசியில் கறிவேப்பிலையை கிள்ளி சேர்க்கவும்.

மைசூர் ரசம்

தேவையானவை: வேக வைத்த துவரம்பருப்பு – அரை கப்,  தக்காளி – 6, வெல்லம் – சிறிய துண்டு, கடலைப்பருப்பு – 2 டீஸ்பூன், காய்ந்த மிளகாய் – 4, தனியா – 2 டீஸ்பூன், தேங்காய் துருவல் – 2 டீஸ்பூன், கடுகு – ஒரு டீஸ்பூன், மிளகு, சீரகம் – தலா ஒரு டீஸ்பூன், நெய், கொத்தமல்லி, கறிவேப்பிலை – சிறிதளவு, உப்பு – தேவையான அளவு.

செய்முறை: நெய்யில் கடலைப்பருப்பு, தனியா, மிளகு, காய்ந்த மிளகாய் ஆகியவற்றை சிவப்பாக வறுத்துக் கொள்ளவும் (சீரகத்தை வறுக்க வேண்டாம்). மிக்ஸியில் தண்ணீர் விட்டு, வறுத்து வைத்திருப்பவற்றுடன் தேங்காய் துருவல் சேர்த்து விழுதாக அரைக்கவும். கூடவே சீரகத்தை சேர்த்து அரைத்துக் கொள்ளவும். தக்காளியை தண்ணீர் சேர்த்து மிக்ஸியில் அரைக்கவும். தக்காளி சாறு, வேகவைத்து மசித்த துவரம்பருப்பு மற்றும் பருப்பு வேகவைத்த தண்ணீர் இவற்றுடன் அரைத்த விழுதையும் சேர்த்து, உப்பு போட்டு, 5 நிமிடம் கொதிக்கவிட்டு இறக்கவும். நெய்யில் கடுகு தாளித்துச் சேர்க்கவும். வெல்லம், கொத்தமல்லி, கறிவேப்பிலை சேர்க்கவும்.

மிளகு ரசம்

தேவையானவை: புளித் தண்ணீர் – 2 கப், மிளகு – 2 டீஸ்பூன், பெருங்காயத்தூள் – அரை டீஸ்பூன், காய்ந்த மிளகாய் – 3, கறிவேப்பிலை – சிறிதளவு, கடுகு, சீரகம் – தலா ஒரு டீஸ்பூன், மஞ்சள்தூள் – அரை டீஸ்பூன், எண்ணெய், உப்பு – தேவையான அளவு.

செய்முறை: மிளகு, காய்ந்த மிளகாய், சீரகம் ஆகியவற்றை மிக்ஸியில் விழுதாக அரைத்துக் கொள்ளவும். பாத்திரத்தில் புளித் தண்ணீரை விட்டு, மஞ்சள்தூள் சேர்த்து புளிவாசனை போகும் வரை கொதிக்க விடவும். பிறகு அரைத்த விழுது, உப்பு, பெருங்காயத்தூள் சேர்த்து 2 நிமிடம் கொதிக்க வைத்து கீழே இறக்கவும். எண்ணெயில் கடுகு தாளித்துச் சேர்த்து, கறிவேப்பிலையை கிள்ளிப் போடவும்.

மாங்காய் ரசம்

தேவையானவை: மாங்காய் துருவல் – அரை கப், துவரம்பருப்பு, மிளகு – தலா 2 டீஸ்பூன், சீரகம் – ஒரு டீஸ்பூன், கொத்தமல்லி, கறிவேப்பிலை – சிறிதளவு, தக்காளி சாறு – கால் கப், கடுகு, பெருங்காயத்தூள் – தலா அரை டீஸ்பூன், எண்ணெய், உப்பு –  தேவையான அளவு.

செய்முறை: துவரம்பருப்பு, மிளகு, சீரகம் ஆகியவற்றை மிக்ஸியில் அரைத்துக் கொள்ளவும். மாங்காய் துருவலை சிறிதளவு தண்ணீர் விட்டு வேக வைத்துக் கொள்ளவும். ஆறியபிறகு மிக்ஸியில் அரைத்துக் கொள்ளவும். இதனுடன் தக்காளி சாறு, உப்பு, அரைத்து வைத்திருக்கும் பொடி, பெருங்காயத்தூள் சேர்த்து, 2 நிமிடம் கொதிக்க வைத்து கீழே இறக்கவும். எண்ணெயில் கடுகு தாளித்துச் சேர்த்து… கொத்தமல்லி, கறிவேப்பிலை தூவவும்.

அரைத்து விட்ட வேப்பம்பூ ரசம்

தேவையானவை: காய்ந்த வேப்பம்பூ – 2 டேபிள்ஸ்பூன், தக்காளி – ஒன்று, புளித் தண்ணீர் – 2 கப், கடுகு, நெய் (அ) எண்ணெய், உப்பு – தேவையான அளவு. வறுத்து அரைக்க: கடலைப்பருப்பு, தனியா – தலா 2 டீஸ்பூன், மிளகு – ஒரு டீஸ்பூன், காய்ந்த மிளகாய் – 4, பெருங்காயத்தூள் – அரை டீஸ்பூன்.

செய்முறை: வறுத்து அரைக்கக் கொடுத்துள்ளவற்றை அரைக்கும்போது, தக்காளியையும் அரைத்து எடுக்கவும். இதனுடன் தேவையான புளித் தண்ணீர் சேர்த்து கொதிக்கவிட்டு, உப்பு சேர்க்கவும். நெய் அல்லது எண்ணெயில் கடுகு, வேப்பம்பூ தாளித்துச் சேர்த்து, ஒரு கொதி வந்ததும் இறக்கவும்.

திடீர் ரசம்

தேவையானவை: புளி – எலுமிச்சம் பழ அளவு, துவரம்பருப்பு – 3 டீஸ்பூன், மிளகு – ஒரு டீஸ்பூன், தனியா – 6 டீஸ்பூன், கடுகு, சீரகம் – தலா ஒரு டீஸ்பூன், பெருங்காயத்தூள் – அரை டீஸ்பூன், காய்ந்த மிளகாய் – 4, கறிவேப்பிலை – சிறிதளவு, எண்ணெய், உப்பு – தேவையான அளவு.

செய்முறை: புளி, துவரம்பருப்பு, தனியா, மிளகு, காய்ந்த மிளகாய் ஆகிவற்றை லேசாக எண்ணெயில் வறுத்து, மிக்ஸியில் பவுடராக செய்து கொள்ளவும். இதில் கடுகு, சீரகம், கறிவேப்பிலை தாளித்துச் சேர்த்து, உப்பு, பெருங்காயத்தூள் ஆகியவற் றையும் சேர்த்து நன்றாகக் கலக்கவும். ரசம் தேவைப்படும் போது ஒரு பாத்திரத்தில் இந்தப் பொடியை போட்டு, தேவையான தண்ணீர் விட்டு 2 நிமிடம் கொதிக்க வைத்து இறக்கவும். சட்டென்று செய்யக் கூடியது இந்த ரசம்.

டொமேட்டோ ப்யூரி ரசம்

தேவையானவை: டொமேட்டோ ப்யூரி (டிபார்ட்மென்ட் ஸ்டோர்களில் கிடைக்கும்) – ஒரு கப்,

மஞ்சள்தூள் – அரை டீஸ்பூன், ரசப்பொடி – 2 டீஸ்பூன், கடுகு, சீரகம் – தலா ஒரு டீஸ்பூன், பெருங்காயத்தூள் – அரை டீஸ்பூன், கொத்தமல்லி, கறிவேப்பிலை – சிறிதளவு, எண்ணெய் – ஒரு டீஸ்பூன், உப்பு – தேவையான அளவு.

செய்முறை: டொமேட்டோ ப்யூரியில் தேவையான தண்ணீர் விட்டு, மஞ்சள்தூள் சேர்த்து பச்சை வாசனை போகும் வரை கொதிக்கவிடவும். பிறகு ரசப்பொடி, உப்பு, பெருங்காயத்தூள் போட்டு 2 நிமிடம் கொதிக்கவிடவும். எண்ணெயில் கடுகு, சீரகம் தாளித்துச் சேர்க்கவும். கறிவேப்பிலை, கொத்தமல்லி தூவவும்.

தனியா ரசம்

தேவையானவை: தனியா – 4 டீஸ்பூன், காய்ந்த மிளகாய் – 4, துவரம்பருப்பு – 2 டீஸ்பூன், சீரகம் – 2 டீஸ்பூன், தக்காளி – கால் கிலோ, கடுகு – ஒரு டீஸ்பூன், எண்ணெய், உப்பு – தேவையான அளவு.

செய்முறை: தனியா, காய்ந்த மிளகாய், துவரம்பருப்பு, சீரகம் ஆகியவற்றை எண்ணெயில் வறுத்து அரைக்கவும். தக்காளியை மிக்ஸியில் அரைத்து, வறுத்து அரைத்த விழுது, உப்பு ஆகியவற்றை அதனுடன் சேர்த்து, தேவையான தண்ணீர் விட்டுக் கரைத்து, அடுப்பில் வைத்து 5 நிமிடம் கொதிக்கவிடவும். பிறகு கீழே இறக்கி, கடுகு தாளிக்கவும்.

பார்லி ரசம்

தேவையானவை: பார்லி – ஒரு கப், மிளகு – 2 டீஸ்பூன், சீரகம் – ஒரு டீஸ்பூன், தக்காளி சாறு – அரை கப், கடுகு, எண்ணெய், உப்பு – தேவையான அளவு.

செய்முறை: மிளகு, சீரகத்தை ஒன்றிரண்டாக பொடிக்கவும். பார்லியில் 3 கப் தண்ணீர் விட்டு நன்றாக வேக வைக்கவும் இந்த தண்ணீருடன் தக்காளி சாறு, மிளகு – சீரகப் பொடி, உப்பு போட்டு கொதிக்க வைக்கவும். எண்ணெயில் கடுகு தாளித்துச் சேர்த்து இறக்கவும்.

மோர் ரசம்

தேவையானவை: மோர் – 2 கப், மஞ்சள்தூள் – கால் டீஸ்பூன், துவரம்பருப்பு – 2 டீஸ்பூன், தனியா – 2 டீஸ்பூன், வெந்தயம், கடுகு – தலா அரை டீஸ்பூன், மிளகு – ஒரு டீஸ்பூன், சீரகம் – ஒரு டீஸ்பூன், கறிவேப்பிலை – சிறிதளவு, எண்ணெய், உப்பு – தேவையான அளவு,

செய்முறை: துவரம்பருப்பு, தனியா, வெந்தயம், மிளகு ஆகியவற்றை வறுத்து, சீரகத்தை சேர்த்து அரைக்கவும். மோரில் மஞ்சள்தூள், உப்பு, அரைத்த விழுது சேர்த்து லேசாக சூடு செய்து (கொதிக்க வைக்க வேண்டாம்) கீழே இறக்கவும். எண்ணெயில் கடுகு, கறிவேப்பிலை தாளித்துச் சேர்க்கவும்.

 

புளி இல்லாத ரசம்

தேவையானவை: தக்காளி சாறு – 2 கப், வேக வைத்து கரைத்த துவரம்பருப்பு தண்ணீர் – அரை கப், இஞ்சித் துருவல் – ஒரு டீஸ்பூன், பச்சை மிளகாய் (நீள வாக்கில் கீறியது) – 2, கறிவேப்பிலை – சிறிதளவு, உளுத்தம்பருப்பு – 2 டீஸ்பூன், மிளகு, கடுகு – தலா ஒரு டீஸ்பூன், எண்ணெய், உப்பு – தேவையான அளவு.

செய்முறை :  உளுத்தம்பருப்பையும், மிளகையும் சிறிது எண்ணெய் விட்டு வறுத்து, மிக்ஸியில் பொடிக்கவும். தக்காளி சாறு, பருப்புத் தண்ணீர், உப்பு ஆகியவற்றை ஒன்றாக சேர்த்து, அரைத்த பொடியையும் போட்டு 2 நிமிடம் கொதிக்கவிடவும். கீறிய பச்சை மிளகாய், இஞ்சித் துருவல், கறிவேப்பிலை சேர்த்து கீழே இறக்கி, எண்ணெயில் கடுகு தாளித்துச் சேர்க்கவும்.

புதினா ரசம்

தேவையானவை: புதினா இலைகள் – ஒரு கப், மிள காய்த்தூள் – ஒரு டீஸ்பூன், சீரகத்தூள் – ஒரு டீஸ்பூன், பெருங்காயத்தூள் – அரை டீஸ்பூன், தக்காளி சாறு (அ) புளித் தண்ணீர் – 2 கப், கடுகு, எண்ணெய், உப்பு – தேவையான அளவு.

செய்முறை: புதினா இலைகளை தண்ணீர் விட்டு அரைத்து வடிகட்டவும் இந்த நீரில் உப்பு, மிளகாய்தூள், சீரகத்தூள் பெருங்காயத் தூள், தக்காளி சாறு அல்லது புளி தண்ணீர் சேர்த்து இரண்டு நிமிடம் கொதிக்கவிடவும். எண்ணெயில் கடுகு தாளித்துச் சேர்த்து இறக்கவும்.

 

இஞ்சி ரசம்

தேவையானவை: இஞ்சித் துருவல் – கால் கப், துவரம்பருப்பு – 2 டீஸ்பூன், மிளகு – அரை டீஸ்பூன், சீரகம் – ஒரு டீஸ்பூன், தக்காளி சாறு – 2 கப், கடுகு – ஒரு டீஸ்பூன், கறிவேப்பிலை – சிறிதளவு, நெய் – ஒரு டீஸ்பூன், உப்பு – தேவையான அளவு.

செய்முறை: இஞ்சித் துருவலுடன் மிளகு, சீரகம், கறிவேப்பிலை, துவரம்பருப்பு சேர்த்து விழுதாக அரைத்துக் கொள்ளவும். இதில் உப்பு, தக்காளி சாறு சேர்த்து 5 நிமிடம் கொதிக்க வைத்து இறக்கவும். நெய்யில் கடுகு தாளித்துச் சேர்க்கவும்.

இளநீர் ரசம்

தேவையானவை: இளநீர் – 2 கப், தக்காளி சாறு – அரை கப், துவரம்பருப்பு, மிளகு, சீரகம் – தலா 2 டீஸ்பூன், பெருங்காயத்தூள் – கால் டீஸ்பூன், இளநீர் வழுக்கை – கால் கப், கடுகு, எண்ணெய், உப்பு – தேவையான அளவு

செய்முறை: துவரம்பருப்பு, மிளகு, சீரகம் ஆகியவற்றை தண்ணீர் விட்டு அரைத்து, கடைசியில் இளநீர் வழுக்கையையும் சேர்த்து ஒரு சுற்று சுற்றி எடுக்கவும். இதனுடன் இளநீர், தக்காளி சாறு, உப்பு சேர்த்து 2 நிமிடம் கொதிக்க வைத்து இறக்கவும். எண்ணெயில் கடுகு, பெருங்காயத்தூள் தாளித்துச் சேர்க்கவும்.

ஸ்பெஷல் எலுமிச்சை ரசம்

தேவையானவை: தக்காளி – 3, பெருங்காயத்தூள் – அரை டீஸ்பூன், கொத்தமல்லி – ஒரு கப், சீரகம் – 2 டீஸ்பூன், பச்சை மிளகாய் – 2, தேங்காய் துருவல் – 2 டீஸ்பூன், எலுமிச்சைச் சாறு – 2 டீஸ்பூன், கடுகு, நெய், உப்பு – தேவையான அளவு.

செய்முறை: தக்காளி, கொத்தமல்லி, பச்சை மிளகாய், சீரகம், ஆகியவற்றுடன் தேங்காய் துருவல் சேர்த்து விழுதாக அரைக்கவும் இதனுடன் தேவையான தண்ணீர், பெருங்காயத்தூள், உப்பு சேர்த்து 2 நிமிடம் கொதிக்க விட்டு கீழே இறக்கி, எலுமிச்சைச் சாறு சேர்க்கவும். கடைசியாக, நெய்யில் கடுகு தாளித்துச் சேர்க்கவும்.

அரைத்துவிட்ட பூண்டு ரசம்

தேவையானவை: துவரம்பருப்பு – 2 டீஸ்பூன், தனியா – 4 டீஸ்பூன், மிளகு – 2 டீஸ்பூன், சீரகம் – ஒரு டீஸ்பூன், பூண்டு பல் – 10, புளித் தண்ணீர் – 2 கப், மஞ்சள்தூள் – அரை டீஸ்பூன், கடுகு, எண்ணெய், உப்பு – தேவையானஅளவு.

செய்முறை: துவரம்பருப்பு, தனியா, மிளகு,  சீரகம், பூண்டு பல் ஆகியவற்றை விழுதாக அரைத்துக் கொள்ளவும். புளித் தண்ணீரில் மஞ்சள்தூள் சேர்த்து புளி வாசனை போகும் வரை கொதிக்க விடவும். அதில் அரைத்த விழுதைச் சேர்த்து, உப்பு போட்டு 2 நிமிடம் கொதிக்க விட்டு கீழே இறக்கவும். எண்ணெயில் கடுகு தாளித்துச் சேர்க்கவும்.

ஓமவள்ளி ரசம்

தேவையானவை: ஓமவள்ளி இலை – 5, சுக்கு – ஒரு சிறிய துண்டு, மிளகு – அரை டீஸ்பூன், கடுகு, சீரகம் – தலா ஒரு டீஸ்பூன், துவரம்பருப்பு – 2 டீஸ்பூன், தக்காளி சாறு – 2 கப்,  நெய், எண்ணெய், உப்பு – தேவையான அளவு.

செய்முறை: வாணலியில் சிறிது எண்ணெய் விட்டு, காய்ந்ததும் ஓமவள்ளி இலை, சுக்கு, துவரம்பருப்பு, மிளகு ஆகியவற்றை லேசாக வதக்கி, விழுதாக அரைக்கவும். இதை தக்காளி சாறுடன் கலந்து தேவையான தண்ணீர் விட்டு, உப்பு சேர்த்து 2 நிமிடம் கொதிக்க வைக்கவும். கீழே இறக்கி நெய்யில் கடுகு, சீரகம் தாளித்துச் சேர்க்கவும்.

 

ஸ்பெஷல் பூண்டு ரசம்

தேவையானவை: புளித் தண்ணீர் – 2 கப், துவரம்பருப்பு – 2 டீஸ்பூன், சீரகம் – ஒரு டீஸ்பூன், பூண்டு – 4 பல், தக்காளி – ஒன்று, கடுகு – ஒரு டீஸ்பூன், கறிவேப்பிலை – சிறிதளவு, எண்ணெய், உப்பு – தேவையான அளவு.

செய்முறை: சிறிதளவு எண்ணெயில் துவரம்பருப்பு, சீரகம், பூண்டு ஆகியவற்றை வதக்கி கரகரப்பாக அரைத்துக் கொள்ளவும். புளித் தண்ணீரில் தக்காளி துண்டுகளை வேகவிடவும். பிறகு அரைத்த விழுது, உப்பு சேர்க்கவும். 2 நிமிடம் கொதிக்க வைத்து இறக்கவும். எண்ணெயில் கடுகு, கறிவேப்பிலை தாளித்துச் சேர்க்கவும்.

உருண்டை ரசம்

தேவையானவை: துவரம்பருப்பு – அரை கப், கடலைப்பருப்பு – கால் கப், புளித் தண்ணீர் – 2 கப், மஞ்சள்தூள் – அரை டீஸ்பூன்,  கறிவேப்பிலை, கொத்தமல்லி – சிறிதளவு,  கடுகு, எண்ணெய், உப்பு – தேவையான அளவு.

வறுத்து அரைக்க: உளுத்தம்பருப்பு – 2 டீஸ்பூன், மிளகு – ஒரு டீஸ்பூன், காய்ந்த மிளகாய் – 3, பெருங்காயத்தூள் – அரை டீஸ்பூன்.

செய்முறை: துவரம்பருப்பு, கடலைப்பருப்பை ஊற வைத்து, அரைத்து ஆவியில் வேக விடவும். வறுத்து அரைக்கக் கொடுத்துள்ளவற்றை விழுதாக அரைத்துக் கொள்ளவும்.

புளித் தண்ணீருடன் மஞ்சள்தூள் சேர்த்து, புளி வாசனை போகும் வரை கொதிக்கவிடவும். வறுத்து அரைத்த விழுதை இதில் சேர்த்து, உப்பு போடவும். ஆவியில் வேக வைத்து எடுத்த பருப்பு கலவையிலிருந்து சிறிய சிறிய உருண்டைகளாக உருட்டி ரசத்தில் போட்டு, 2 நிமிடம் கொதிக்கவிட்டு இறக்கவும். எண்ணெயில் கடுகு தாளித்துச் சேர்க்கவும். கடைசியில் கொத்தமல்லி, கறிவேப்பிலை கிள்ளிப் போடவும்.

Posted in படித்ததில் பிடித்தது | 2 Comments

தோசை வகைகள்

சன்னா தோசை

காலிஃப்ளவர் மசாலா தோசை
வரகு – ராகி தோசை
கம்பு – சோள தோசை
பச்சைப் பயறு தோசை
இனிப்பு தோசை
பசலைக்கீரை தோசை
வரகு – தினை – புதினா தோசை
குதிரைவாலி – சோள தோசை
மிக்ஸ்டு தோசை
கடலை மாவு தோசை
அரிசி – அவல் தோசை
பருப்பு அடை தோசை
பருப்பு – கீரை தோசை
ஜவ்வரிசி – வரகு தோசை

தோசைப் பிரியர்களை சுவையால் கட்டிப்போடுவது மட்டுமல்லாமல், தோசையே பிடிக்காதவர்களையும் விரும்பிச் சாப்பிட வைக்கும் விதத்தில் அசத்தலான 15 தோசை ரெசிப்பிக்கள் இங்கே..! இனி, தினம் தினம் `தோசைத் திருவிழா’தான் உங்கள் வீட்டில்!


சன்னா தோசை

தேவையானவை:
சன்னா மசாலாவுக்கு:
வெள்ளை/கறுப்பு கொண்டைக்கடலை – 50 கிராம் (ஊறவைத்து, வேகவைக்கவும்)
பெரிய வெங்காயம் – 1
தக்காளி – 1
இஞ்சி – ஒரு துண்டு
பூண்டு – 5 பல்,
மிளகாய்த்தூள் – தேவையான அளவு
மல்லித்தூள் (தனியாத்தூள்) – ஒரு டீஸ்பூன்
மஞ்சள்தூள் – சிறிதளவு
எண்ணெய், உப்பு – தேவையான அளவு

தோசைக்கு:
இட்லி மாவு – 2 கப்
பச்சரிசி மாவு – 2 கப் (உதிரி மாவு)
நெய் (அ) நல்லெண்ணெய் – தேவையான அளவு

சன்னா மசாலா செய்யும் முறை:
கடாயில் எண்ணெய் விட்டு பொடியாக நறுக்கிய இஞ்சி, பூண்டு சேர்த்து வதக்கவும். அதனுடன் மல்லித்தூள், மஞ்சள்தூள், மிளகாய்த்தூள் சேர்த்து மேலும் வதக்கவும். பொடியாக நறுக்கிய வெங்காயம், தக்காளியை அடுத்தடுத்து சேர்த்து நன்கு வதக்கவும். பிறகு வேகவைத்த கொண்டைக்கடலையை சேர்த்து வதக்கவும். தேவையான உப்பு, தண்ணீர் சேர்த்து சன்னா மசாலாவைத் தயார் செய்யவும்

தோசை செய்யும் முறை: இட்லி மாவு மற்றும் பச்சரிசி மாவை உப்பு சேர்த்து தோசை பதத்துக்கு ஒன்றாகக் கலக்கவும். தோசைக்கல்லை சூடாக்கி மாவை ஊற்ற… அடுப்பை மிதமான தீயில் வைத்து, சுற்றிலும் நெய் (அ) நல்லெண்ணெய் விட்டு… தோசை வேகும்போது தயார் செய்த சன்னா மசாலாவை அதன் மீது பரவலாக தேய்த்து மடித்து எடுத்து சுவையாகச் சாப்பிடவும்.


காலிஃப்ளவர் மசாலா தோசை

தேவையானவை:
தோசை மாவு – 200 கிராம்்
மல்லித்தூள் (தனியாத்தூள்) – ஒரு டீஸ்பூன்
இஞ்சி – பூண்டு விழுது – ஒரு டீஸ்பூன்
பொடியாக நறுக்கிய காலிஃப்ளவர் -100 கிராம்
மிளகாய்த்தூள், மஞ்சள்தூள் – தேவையான அளவு
பெரிய வெங்காயம் – 100 கிராம்
பெங்களூரு தக்காளி – ஒன்று (பொடியாக நறுக்கவும்)
உப்பு, எண்ணெய் – தேவையான அளவு

செய்முறை:
கடாயில் எண்ணெய் விட்டு, காய்ந்ததும் பொடியாக நறுக்கிய வெங்காயம், தக்காளியை அடுத்தடுத்து சேர்த்து வதக்கி, பின்னர் காலிஃப்ளவரையும் சேர்த்து வதக்கிக்கொள்ளவும். இதனுடன் இஞ்சி – பூண்டு விழுது, மல்லித்தூள், மஞ்சள்தூள், மிளகாய்த்தூள் மற்றும் உப்பு சேர்த்துக் கிளறவும். இதில் சிறிதளவு தண்ணீர் சேர்த்துக் கிளறி மிதமான தீயில் நன்கு வேகவைத்து இறக்கவும். தோசைக்கல்லை சூடாக்கி, மாவை ஊற்றி, சுற்றிலும் எண்ணெய் விட்டு… தயார் செய்து வைத்த காலிஃப்வளர் மசாலாவை அதில் வைத்து பரவலாகத் தேய்த்து தோசையை மூடி வேகவிட்டு எடுத்தால்… சூடான காலிஃப்வளர் மசாலா தோசை ரெடி!


வரகு – ராகி தோசை

தேவையானவை:
வரகு அரிசி – 200 கிராம்
கோதுமை – 100 கிராம்
ராகி – 100 கிராம்
உளுந்து – 2 டேபிள்ஸ்பூன்
பொடியாக நறுக்கிய கொத்தமல்லித்தழை, கறிவேப்பிலை – சிறிதளவு
வெந்தயம் – 2 டீஸ்பூன்
நெய் (அ) நல்லெண்ணெய் – தேவையான அளவு
உப்பு – தேவையான அளவு

செய்முறை:
வரகு அரிசி, ராகி, கோதுமையை தண்ணீரில் 5 மணி நேரமும், வெந்தயம், உளுந்தை ஒரு மணி நேரமும் தனித்தனியாக ஊறவைத்து தனியாக அரைக்கவும். எல்லா மாவையும் ஒன்றாக கலக்கவும். இதில் தேவையான உப்பு, நறுக்கிய கொத்தமல்லித்தழை, கறிவேப்பிலை சேர்க்கவும். 3 முதல் 5 மணி நேரம் புளிக்க வைக்கவும். தோசைக்கல்லை சூடாக்கி, மாவை தோசைகளாக ஊற்றி, நெய் அல்லது நல்லெண்ணெய் விட்டு சுட்டெடுக்கவும்.
இது மிகவும் சத்தான தோசை.


கம்பு – சோள தோசை

தேவையானவை:
கம்பு – 100 கிராம்
அரிசி – 200 கிராம்,
சோளம் – 50 கிராம்
உளுந்து – 2 டேபிள்ஸ்பூன்
பெரிய வெங்காயம் – 1
சிறிதாக நறுக்கிய காய்ந்த மிளகாய் – ஒரு டீஸ்பூன்
கடலைப்பருப்பு, உளுத்தம்பருப்பு – தலா ஒன்றரை டீஸ்பூன்
எண்ணெய், உப்பு – தேவையான அளவு

செய்முறை:
அரிசி, கம்பு, சோளத்தை தண்ணீரில் 8 மணி நேரமும், உளுந்தை 1 மணி நேரமும் ஊறவைத்து நன்கு அரைத்துக்கொள்ளவும். வாணலியில் சிறிதளவு எண்ணெய் விட்டு, சூடானதும் கடலைப்பருப்பு, உளுத்தம்பருப்பை வறுத்துக்கொள்ளவும். அதனுடன் பொடியாக நறுக்கிய பெரிய வெங்காயம், காய்ந்த மிளகாயைச் சேர்த்து வதக்கவும். இவை அனைத்தையும் மாவுடன் சேர்த்து, போதுமான உப்பு சேர்த்து நன்கு கலக்கிக்கொள்ளவும். மாவை சிறிது நேரம் புளிக்க வைக்கவும். பின்னர் தோசைக்கல்லை சூடாக்கி, மாவை தோசைகளாக வார்த்து, சுற்றிலும் எண்ணெய் விட்டு சுட்டெடுக்கவும்.


பச்சைப் பயறு தோசை

தேவையானவை:
பச்சைப் பயறு – 100 கிராம்
பெரிய வெங்காயம் – ஒன்று
காய்ந்த மிளகாய் – 3 (அல்லது காரத்துக்கேற்ப)
பெருங்காயத்தூள் – அரை டீஸ்பூன்
சீரகம் – 2 டீஸ்பூன்
நல்லெண்ணெய் (அ) நெய் – தேவையான அளவு
கறிவேப்பிலை, கொத்தமல்லித்தழை, உப்பு – தேவையான அளவு

செய்முறை:
பச்சைப் பயறைக் கழுவி 3 மணி நேரம் ஊறவைக்கவும். அதனுடன் சீரகம், காய்ந்த மிளகாயைச் சேர்த்து நன்கு அரைத்துக்கொள்ளவும். அதில் உப்பு, பெருங்காயத்தூள், பொடியாக நறுக்கிய வெங்காயம், கறிவேப்பிலை, கொத்தமல்லித்தழை சேர்த்து, சிறிதளவு தண்ணீர் விட்டு நன்கு கலக்கிக்கொள்ளவும். சூடான தோசைக்கல்லில் மாவை ஊற்றி, நல்லெண்ணெய் (அ) நெய் விட்டு சுட்டெடுக்கவும்.


இனிப்பு தோசை

தேவையானவை:
இட்லி அரிசி – 100 கிராம்
பச்சரிசி – 50 கிராம்
உளுந்து – 25 கிராம்
ஏலக்காய் – 2
பொடித்த வெல்லம் – 100 கிராம்
தேங்காய்த் துருவல் – 100 கிராம்
நெய் – தேவையான அளவு.

செய்முறை:
இட்லி அரிசி மற்றும் பச்சரிசியை 5 மணி நேரமும், உளுந்தை ஒரு மணி நேரமும் ஊறவைத்து, தண்ணீரை வடித்து, தேங்காய்த் துருவல், பொடித்த வெல்லம், ஏலக்காய் சேர்த்து நன்கு அரைத்துக்கொள்ளவும். தோசைக்கல்லில் மாவை தோசையாக வார்த்து, நெய் விட்டு சுட்டெடுக்கவும்.
இதே மாவை பணியாரக்கல்லில் ஊற்றி, நெய் சேர்த்து பணியாரமாகவும் சுட்டெடுக்கலாம்.


பசலைக்கீரை தோசை

தேவையானவை:
இட்லி மாவு – 200 கிராம்
பசலைக்கீரை – அரை கட்டு
பச்சை மிளகாய் – 2
பெரிய வெங்காயம் – 1
தேங்காய் எண்ணெய், உப்பு – தேவையான அளவு.

செய்முறை:
கடாயில் எண்ணெய் விட்டு, பொடியாக நறுக்கிய பசலைக் கீரையைப் போட்டு வதக்கி எடுத்து அரைத்துக்கொள்ளவும். அதே எண்ணெயில் பொடியாய் நறுக்கிய வெங்காயம் மற்றும் பச்சை மிளகாயைச் சேர்த்து வதக்கிக்கொள்ளவும். இவை அனைத்தையும் இட்லி மாவுடன் சேர்த்து, உப்பு சேர்த்து நன்கு கலக்கிக்கொள்ளவும். மாவை சூடான தோசைக் கல்லில் ஊற்றி, தேங்காய் எண்ணெய் விட்டு சுட்டெடுக்கவும்.


வரகு – தினை – புதினா தோசை

தேவையானவை:
வரகு அரிசி, இட்லி அரிசி – தலா 100 கிராம்
தினை, உளுந்து – தலா 50 கிராம்
சிவப்பு அவல் – அரை கிலோ
வெந்தயம் – 2 டீஸ்பூன்
எண்ணெய், உப்பு – தேவையான அளவு

புதினா தொக்குக்கு:
புதினா – அரை கட்டு
சீரகம், கடலைப்பருப்பு – தலா ஒரு டீஸ்பூன்
உளுத்தம்பருப்பு – சிறிதளவு
தேங்காய்த் துருவல் – அரை கப்
காய்ந்த மிளகாய், எண்ணெய், உப்பு – தேவையான அளவு

செய்முறை:
வரகு அரிசி, இட்லி அரிசி, தினையை 8 மணி நேரமும், வெந்தயம், உளுந்தை ஒரு மணி நேரமும் ஊறவைத்து, ஒன்றாக சேர்த்து அரைத்து, உப்பு சேர்க்கவும். சிவப்பு அவலை பத்து நிமிடம் ஊற வைத்து கையால் மசித்து மாவில் சேர்க்கவும். சிறிது நேரம் புளிக்க வைக்கவும். தோசைக்கல்லை சூடாக்கி, மாவை தோசையாக வார்த்து, எண்ணெய் விட்டு சுட்டெடுக்கவும்.
கடாயில் எண்ணெய் விட்டு புதினா தொக்குக்கு கொடுத்தவற்றை (உப்பு நீங்கலாக) சேர்த்து வதக்கி, ஆறியதும் மிக்ஸியில் மையாக அரைத்து, உப்பு சேர்த்துக் கலக்கவும்.
இந்த தொக்கை தோசை மீது தேய்த்து, தோசையைச் சுருட்டி சூடாகப் பரிமாறவும்.


குதிரைவாலி – சோள தோசை

தேவையானவை:
குதிரைவாலி அரிசி – 100 கிராம்
இட்லி அரிசி – 100 கிராம்
சோளம் – 50 கிராம்
உளுந்து – 2 டேபிள்ஸ்பூன்
வெந்தயம் – ஒரு டீஸ்பூன்
கறிவேப்பிலை, கொத்தமல்லித்தழை – சிறிதளவு
ரவை – 50 கிராம்
பச்சரிசி மாவு – 50 கிராம்
வெங்காயம் – 1
பச்சை மிளகாய் – 2
எண்ணெய் (அ) நெய் – தேவையான அளவு
உப்பு – தேவைக்கேற்ப

செய்முறை:
குதிரைவாலி அரிசி, இட்லி அரிசி மற்றும் சோளத்தை 8 மணி நேரமும், உளுந்து மற்றும் வெந்தயத்தை ஒரு மணி நேரமும் ஊறவைத்து நன்கு அரைத்துக்கொள்ளவும். இதனுடன் ரவை, பச்சரிசி மாவை சேர்க்கவும். போதுமான தண்ணீர் சேர்த்து நன்கு கலக்கவும். வாணலியில் எண்ணெய் விட்டு, பொடியாக நறுக்கிய வெங்காயம், பச்சை மிளகாய், கறிவேப்பிலை, கொத்தமல்லித்தழையைச் சேர்த்து வதக்கி, மாவுடன் சேர்த்து, உப்பு போட்டுக் கலக்கவும். பின்பு, மாவை சூடான தோசைக்கல்லில் தோசைகளாக வார்த்து, எண்ணெய் (அ) நெய் விட்டு சுட்டெடுக்கவும்.


மிக்ஸ்டு தோசை

தேவையானவை:
கேரட், பீட்ரூட், முள்ளங்கி – தலா ஒன்று (முற்றாதது – துருவிக்கொள்ளவும்)
இட்லி மாவு – 200 கிராம்
பச்சரிசி மாவு – 100 கிராம் (உதிரி மாவு)
பெரிய வெங்காயம் – ஒன்று
பச்சை மிளகாய் – தேவையான அளவு
கொத்தமல்லித்தழை – சிறிதளவு
நெய் (அ) கடலை எண்ணெய் – தேவையான அளவு
உப்பு – தேவைக்கேற்ப

செய்முறை:
இட்லி மாவுடன் பச்சரிசி மாவைச் சேர்த்துக் கலக்கிக்கொள்ளவும். கடாயில் எண்ணெய் விட்டு… துருவிய கேரட், பீட்ரூட், முள்ளங்கியை சேர்த்து வதக்கிக்கொள்ளவும். அதே எண்ணெயில் பொடியாக நறுக்கிய பச்சை மிளகாய், பெரிய வெங்காயத்தை வதக்கிக்கொள்ளவும்.
வதக்கி வைத்த கேரட், பீட்ரூட், முள்ளங்கியை மாவுடன் சேர்க்கவும். அதனுடன் உப்பு, வதக்கிய வெங்காயம், பச்சை மிளகாய் சேர்த்து நன்கு கலக்கவும். பிறகு, கொத்தமல்லித்தழையைப் பொடியாக நறுக்கி சேர்க்கவும். தோசைக்கல்லை சூடாக்கி, மாவை தோசைகளாக வார்த்து, நெய் (அ) கடலை எண்ணெய் விட்டு சுட்டெடுக்கவும்.


கடலை மாவு தோசை

தேவையானவை:
கடலை மாவு, அரிசி மாவு – தலா 100 கிராம்
கோதுமை மாவு – 50 கிராம்
பெரிய வெங்காயம் – 1
காய்ந்த மிளகாய் – தேவையான அளவு
கடலைப்பருப்பு, உளுத்தம்பருப்பு – தலா ஒரு டீஸ்பூன்
தேங்காய்த் துருவல் – 100 கிராம்
பெருங்காயத்தூள் – ஒரு சிட்டிகை
சீரகம் – ஒரு டீஸ்பூன்
எண்ணெய், உப்பு – தேவையான அளவு

செய்முறை:
கடலை மாவு, அரிசி மாவு, கோதுமை மாவை ஒன்றாக சேர்த்து போதுமான தண்ணீர் சேர்த்துக் கலக்கி… தேங்காய் துருவலைச் சேர்க்கவும். வாணலியில் எண்ணெய் விட்டு, கடலைப்பருப்பு, உளுத்தம்பருப்பு தாளித்து, பொடியாக நறுக்கிய வெங்காயம், காய்ந்த மிளகாயைச் சேர்த்து வதக்கவும். அதனுடன் உப்பு, பெருங்காயத்தூள், சீரகத்தைச் சேர்க்கவும். இவை அனைத்தையும் மாவுடன் சேர்த்துக் கலக்கவும். சூடான தோசைக்கல்லில் மாவை தோசைகளாக வார்த்து, எண்ணெய் விட்டு சுட்டெடுக்கவும்.


அரிசி – அவல் தோசை

பச்சரிசி மாவு (உதிரி மாவு), அவல், அரிசி மாவு (புழுங்கல் அரிசி) – தலா 100 கிராம்
ரவை – 50 கிராம்
சீரகம் – ஒரு டீஸ்பூன்
முந்திரி – 3 (பொடித்துக்கொள்ளவும்)
பெரிய வெங்காயம் – ஒன்று
தேங்காய் – ஒரு மூடி (துருவிக்கொள்ளவும்)
மிளகு – 1 டீஸ்பூன்
கறிவேப்பிலை, கொத்தமல்லித்தழை – சிறிதளவு
எண்ணெய் (அ) நெய் – தேவையான அளவு
உப்பு – தேவைக்கேற்ப

செய்முறை:
அவலை சிறிது நேரம் தண்ணீரில் ஊறவைத்து கையால் மசிக்கவும். பச்சரிசி மாவு, ரவை, மசித்த அவல், அரிசி மாவை ஒன்றாக சேர்த்து போதுமான தண்ணீர் சேர்த்துக் கலக்கவும். தேங்காய்த் துருவல், பொடியாக நறுக்கிய வெங்காயம் ஆகியவற்றை லேசாக எண்ணெயில் வதக்கி மாவுடன் சேர்க்கவும். இதில் உப்பு, மிளகு, சீரகம், பொடித்த முந்திரி, நறுக்கிய கறிவேப்பிலை, கொத்தமல்லித்தழையை மாவில் சேர்த்துக் கலக்கவும். சூடான தோசைக்கல்லில் மாவை தோசைகளாக வார்த்து, எண்ணெய் (அ) நெய் விட்டு சுட்டெடுத்து சுவைக்கவும்.
இதை வெல்லம் சேர்த்து இனிப்பு தோசையாகவும் செய்யலாம்.


பருப்பு அடை தோசை

துவரம்பருப்பு, பச்சைப் பயறு – தலா 100 கிராம்
கடலைப்பருப்பு – 50 கிராம்
கொள்ளு – ஒரு டேபிள்ஸ்பூன்
பச்சரிசி, புழுங்கல் அரிசி – தலா 100 கிராம்
பெருங்காயத்தூள் – அரை டீஸ்பூன்,
சீரகம் – ஒரு டீஸ்பூன்
பூண்டு – 5 பல்
இஞ்சி – சிறிதளவு
தேங்காய் – அரை மூடி (துருவவும்)
கறிவேப்பிலை, கொத்தமல்லித்தழை – சிறிதளவு
தக்காளி, வெங்காயம் – தலா ஒன்று
கடுகு உளுத்தம்பருப்பு, கடலைப்பருப்பு, சீரகம் – சிறிதளவு
காய்ந்தமிளகாய், உப்பு, எண்ணெய் – தேவையான அளவு

செய்முறை:
3 மணி நேரம் ஊறவைத்த துவரம்பருப்பு, பாசிப்பயறு, கடலைப்பருப்பு, கொள்ளு, பச்சரிசி, புழுங்கல் அரிசியுடன்… இஞ்சி, பூண்டு, பெருங்காயத்தூள், சீரகம், காய்ந்த மிளகாய், தேங்காய்த் துருவல், கறிவேப்பிலை, கொத்தமல்லிதழை, தக்காளி, உப்பு சேர்த்து கொரகொரவென்று அரைத்துக்கொள்ளவும்.
வாணலியில் எண்ணெய் விட்டு காய்ந்ததும் கடுகு, உளுத்தம்பருப்பு, கடலைப்பருப்பு தளித்து, பொடியாக நறுக்கிய வெங்காயத்தைச் சேர்த்து வதக்கவும். வெங்காயம் வதங்கியவுடன் அதனுடன் சீரகம், பொடியாக நறுக்கிய கறிவேப்பிலை, கொத்தமல்லித்தழையையும் சேர்த்து வதக்கி அரைத்து வைத்த மாவுடன் சேர்த்துக் கலக்கவும். தோசைக்கல்லை சூடாக்கி, மாவை அடை தோசையாக வார்த்து, சுற்றிலும் எண்ணெய் விட்டு, வேகவிட்டு எடுக்கவும்.


பருப்பு – கீரை தோசை

பச்சைப் பயறு – 100 கிராம்
கோதுமை மாவு – 50 கிராம்
இட்லி மாவு – 100 கிராம்
முருங்கைக்கீரை – 50 கிராம்
பெரிய வெங்காயம் – ஒன்று
சீரகம் – ஒரு டீஸ்பூன்
காய்ந்த மிளகாய், எண்ணெய், உப்பு – தேவையான அளவு

செய்முறை:
பச்சைப் பயறை 2 மணி நேரம் ஊறவைத்து நன்கு அரைத்துக்கொள்ளவும். அதனுடன் இட்லி மாவு, கோதுமை மாவு சேர்க்கவும். முருங்கைக்கீரையை தனியே வேகவைத்து அரைத்த மாவுடன் சேர்க்கவும். பொடியாக நறுக்கிய வெங்காயம், காய்ந்த மிளகாயை மாவுடன் சேர்த்து… உப்பு, சீரகம், சிறிதளவு தண்ணீர் சேர்த்து நன்றாகக் கலக்கிக்கொள்ளவும். சூடான தோசைக்கல்லில் மாவை தோசையாக ஊற்றி, எண்ணெய் சேர்த்து, வேகவிட்டு எடுக்கவும்.
முருங்கைக்கீரைக்குப் பதில் சிறுகீரையும் பயன்படுத்தலாம்.


ஜவ்வரிசி – வரகு தோசை

ஜவ்வரிசி – 50 கிராம்
பச்சரிசி – 100 கிராம்
வரகு அரிசி – 100 கிராம்
மிளகு, சீரகம் – தலா 1 டீஸ்பூன்
எண்ணெய் – தேவையான அளவு
உப்பு – தேவையான அளவு


செய்முறை:
பச்சரிசி மற்றும் வரகு அரிசியை தண்ணீர் ஊற்றி ஐந்து முதல் ஆறு மணி நேரம் வரை ஊறவைக்கவும். ஜவ்வரிசியை ஒரு மணி நேரம் தண்ணீரில் ஊறவைக்கவும். ஊறவைத்தவற்றை எல்லாம் ஒன்றாக கிரைண்டரில் போட்டு, உப்பு சேர்த்து அரைக்கவும். இதில் சீரகம், மிளகு சேர்த்து கலக்கிகொள்ளவும். இதனை மூன்று மணி நேரம் புளிக்க விடவும். தோசைக்கல்லை சூடாக்கி, மாவை தோசைகளாக ஊற்றி சுற்றிலும் எண்ணெய் விட்டு சுட்டெடுக்கவும்.

Posted in படித்ததில் பிடித்தது | Leave a comment

தேங்காய் உருண்டை

அரிசி 1டம்ளர்
தேங்காய் பூ… 2டம்ளர்
மண்டைவெல்லம் 100கிராம்
**
செய்முறை…
அரிசியை சிவக்க வறுத்துக்கங்க
மண்டைவெல்லத்தை பொடியாக்கி வைங்க ..
வறுத்த அரிசியை மிக்ஸிஜார்ல போட்டு பொடியாக்கிட்டு
துருவிய தேங்காயை போட்டு
மிக்ஸ் பண்ணுங்க..
கடைசி பொடித்து வைத்த வெல்லம் போட்டு கலக்கிக்கங்க
கிளறிவிட்டு கிளறிவிட்டு மிக்ஸி ஜார்ல போட்டு கலந்து வெச்சுட்டு பாத்ரத்ல கொட்டி சிறுசிறு உருண்டையாக்கி வெச்சிங்கன்னா… செம டேஸ்ட்
3நாள் வரை கெட்டு போகாது..
ஹெல்த்தி டேஸ்ட்டி.. குழந்தைகள் விரும்பி சாப்டுவாங்க…
(தண்ணீர் சேக்காதிங்க)

Image may contain: food and indoor
Posted in படித்ததில் பிடித்தது | Leave a comment

உருளைக்கிழங்கு போண்டா

தேவையானவை

உருளைக்கிழங்கு – 1 கிலோ,
பச்சை மிளகாய் – 10, கறிவேப்பிலை,
கொத்தமல்லித் தழை – சிறிதளவு,
கடுகு – சிறிதளவு,
உளுந்து – 1 மேசைக்கரண்டி,
தேங்காய் எண்ணெய்- 3 மேசைக்கரண்டி,
உப்பு – தேவையான அளவு,
பெருங்காயப் பவுடர் – 1/2 மேசைக்கரண்டி,
கடலை மாவு – 250 கிராம்,
மிளகாய்த் தூள் – 1 மேசைக்கரண்டி,
மஞ்சள் தூள் – 1/2 மேசைக்கரண்டி,
தேங்காய் எண்ணெய் – 250 கிராம் (வறுக்க).
செய்முறை

உருளைக்கிழங்கை பிரஷர் குக்கரில் பத்து நிமிடங்கள் வேகவைத்துக் கொள்ளவும். ஆறியதும், தோலுரித்து மசித்துக் கொள்ளவும். கடாயில் தேங்காய் எண்ணெய் சேர்த்து, அதில் கடுகு, உளுந்து, கறிவேப்பிலை, பச்சை மிளகாய், மஞ்சள் தூள், பெருங்காயப் பவுடர் சேர்த்து தாளிக்கவும். பிறகு அதில் வேகவைத்துள்ள உருளைக்கிழங்கை சேர்த்து நன்கு வதக்கவும்.

ஒரு பாத்திரத்தில் கடலைமாவு, மிளகாய்த் தூள், மஞ்சள் தூள் தண்ணீர் சேர்த்து இட்லி மாவு பதத்திற்கு கரைத்து பத்து நிமிடங்கள் வைக்கவும். கடாயில் தேங்காய் எண்ணெய் சேர்த்து சூடானதும், உருளைக் கிழங்கு கலவையை சின்ன சின்ன உருண்டைகளாக உருட்டி மாவில் முக்கி எண்ணெயில் பொன்னிறமாக பொரிக்கவும்.

Posted in படித்ததில் பிடித்தது | Leave a comment